260 myńǵa jýyq adam ataýly áleýmettik kómek aldy
ASTANA. KAZINFORM — 2025 jylǵy 1 tamyzdaǵy jaǵdaı boıynsha 260 myńǵa jýyq adamǵa ataýly áleýmettik kómek kórsetildi. Bul týraly Eńbek jáne halyqty áleýmettik qorǵaý mınıstrligi málim etti.
2025 jylǵy 1 tamyzdaǵy jaǵdaı boıynsha ataýly áleýmettik kómek (budan ári — AÁK) 48,3 myń otbasyndaǵy 259,7 myń adamǵa 18,6 mlrd teńge somasynda taǵaıyndaldy. Bıyl bul maqsattarǵa bıýdjetten 110,7 mlrd teńge qarastyrylǵan.
Buryn habarlanǵandaı, AÁK-niń negizgi maqsaty — aqshalaı tólem túrinde qoldaýdy júzege asyrý jáne otbasynyń eńbekke qabiletti múshelerin jumyspen qamtýǵa járdemdesýdiń belsendi sharalaryna tartý arqyly otbasyn qıyn ómirlik jaǵdaıdan shyǵarý.
AÁK mynalardy kózdeıdi:
— tabysy kedeılik sheginen aspaıtyn azamattarǵa toqsan saıyn áleýmettik kómek taǵaıyndaý;
— tabysy az otbasylardaǵy 1 jas pen 6 jas aralyǵyndaǵy ár balaǵa 1,5 AEK mólsherinde aı saıynǵy qosymsha tólem berý. Aǵymdaǵy jyldyń 1 tamyzyna AÁK alýshylar qatarynan mektep jasyna deıingi 80,3 myń balaǵa 2,4 mlrd teńge somasyna qosymsha tólem taǵaıyndaldy;
— jumysqa ornalastyrý, óz isin ashýǵa nıetti otbasylarǵa granttar berý, biliktilikti arttyrý kýrstaryna jiberý (qajet bolǵan jaǵdaıda) jáne basqalar arqyly jumyspen qamtýǵa járdemdesý.
Qazirgi ýaqytta qazaqstandyqtar AÁK taǵaıyndaýǵa ótinishti turǵylyqty jeri boıynsha mansap ortalyǵynda, aýyl okrýginiń ákimine sondaı-aq Elektrondyq úkimet portaly (egov.kz) arqyly bere alady.
Buǵan deıin habarlanǵandaı, múgedektigi jáne asyraýshysynan aıyrylý boıynsha 434 mlrd teńgeden asa járdemaqy tólendi.