26 jeltoqsanda BIZ VIRGEMIZ FEST qaıyrymdylyq mýzyka festıvali ótedi

ASTANA. QazAqparat - Astana qalasynda eń aýqymdy BIZ VIRGEMIZ FEST respýblıkalyq qaıyrymdylyq mýzykalyq festıvali ótedi. Sharany Biz Virgemiz Qazaqstan qoǵamdyq qory men Astana qalasynyń ákimdigi birlesip, erekshe qajettiligi bar balalardy qoldaý maqsatynda uıymdastyryp jatyr.

Keshtiń basty ereksheligi – álemdik deńgeıdegi halyqaralyq baıqaýlarda kók týymyzdy kókke kóterip júrgen, respýblıka boıynsha óte talantty erekshe balalar úlken sahnada óner kórsetedi.

Shara múmkindigi shekteýli jáne múgedek shyǵarmashylyq daryndy balalar men jastardy, qazaqstandyq estrada juldyzdaryn, metsenattardy, elorda turǵyndary men qonaqtaryn biriktiredi.

Sondaı-aq, festıval barysynda demeýshiler tarapynan eki kópbalaly az qamtylǵan otbasyna páter kilti tabystalady.

Keshtiń basty hedlaıneri – Dımash Qudaıbergen.

Sonymen qatar, festıvalde Kenjebek Nurdoldaı (zaǵıp ánshi, mýzykant, Andreı Malahovtyń «Pesnıa ot vseı dýshı» shoý-baǵdarlamasynyń qatysýshysy), SENSITIVE bı toby (AQSh-ta ótken oryndaýshylyq ónerdiń 25-shi mereıtoılyq Dúnıejúzilik chempıonatynyń jeńimpazdary), Altynshash Muqataeva (ánshi, «100 jańa esim» jobasynyń qatysýshysy) jáne elimizdiń basqa da estrada juldyzdary sahnaǵa shyǵady.

Atap aıtqanda NAZIMA, Tamara Asar, «Bastaý» toby, KOBA&MANS, Mona Songz, ALPHA, Aidyn, Danııar Ótegen (Rin’Go), Qazybek Quraıysh, Baǵjan Oktıabr, Aqtoty Bolshova, Álisher Qonysbaı óner kórsetedi.

Shara kezinde «Qaraqat» mektep stýdııasynyń 100 shákirti jetigende, «Altyn dombyra» mektebiniń 100 oqýshysy dombyrada ulttyq kúılerdi oryndaıdy.

Bıletter Kino.kz saıtynda (baǵasy 15 000 tg-den bastalady).

Ótetin orny:Astana qalasy, «Barys Arena», Turan 57.

Ótetin ýaqyty: 26 jeltoqsan jyl, saǵat 19:00.