26 jastaǵy jigit týysyn taspen uryp óltirgen – Jambyl oblysy
TARAZ. QazAqparat –26 jastaǵy er adam óz týysyn taspen uryp óltirgen. Otbasylyq qaıǵyly oqıǵa Jambyl oblysynyń Talas aýdanynda oryn aldy, dep habarlaıdy QazAqparat tilshisi.
Talas aýdandyq polıtsııa bólimine Qarataý qalasynyń turǵyny qońyraý shalyp, úıdiń aýlasynda óz kúıeýi men onyń týysynyń tóbelesip jatqanyn habarlaǵan. Keleńsiz jaǵdaıdan er adam aýyr jaraqat alyp, aýdandyq aýrýhanada kóz jumǵan.
Polıtseıler «Kisi óltirý» baby boıynsha sotqa deıingi tergeýdi bastap, kúdiktini izin sýytpaı qolǵa túsirdi.
«Jábirlenýshiniń mekenjaıyna onyń 1995 jyly týǵan týys inisi buryn aralarynda bolǵan arazdyqtaryn sheshý úshin kelip, urys kótergen.
Saldarynan aralaryndaǵy daý órship, sońy tóbeleske aınalǵan. Kúdikti jábirlenýshi taspen uryp, oqıǵa bolǵan jerden boı tasalaǵan», – dedi Jambyl oblysy PD Tergeý basqarmasynyń bastyǵy Ábsamat Bekmuhambetov.
Medıtsınalyq saraptama qorytyndysyna sáıkes, kúdikti alkogol men kannabınoıdtardyń áserinen mas kúıde bolǵan. Ol óz qylmysyn tolyq moıyndady. Kúdikti qazir ýaqytsha ustaý ızolıatorynda.
Sotqa deıingi tergeý júrgizilýde.
