«26 jastaǵy jeti balanyń anasy qamqorlyqtan nege tys qalyp otyr?» - respýblıkalyq basylymdarǵa sholý
***
Keshe Memleket basshysy Nursultan Nazarbaevtyń qatysýymen V Astana ekonomıkalyq forýmynyń saltanatty ashylýy bolyp ótti. Osy alqaly jıynǵa arqaý bolǵan maqala el gazeti «Egemen Qazaqstanda» «Álem ekonomıkasyna Astana tórinen kózqaras» degen taqyryppen berildi. «Qazaqstan is júzinde óziniń tańdap alǵan jolynyń ómirsheńdigin kórsetip otyrǵan el retinde bizdiń gúldenýimiz jáne basqa da memleketterdiń gúldenýi turaqtylyq pen beıbitshilik bolmaıynsha múmkin emes ekendigin jaqsy túsinedi. Osyǵan baılanysty álem úzdiksiz progreske qaraı damýy úshin barlyq memleketter úshin mindetti bolatyn HHІ ǵasyrdaǵy álemdik qurylystyń qaǵıdatty irgetasyn qalaýy kerek. Adamzat órkenıetiniń damý qurylymy, meniń oıymsha, mynadaı 5 prıntsıpke negizdelýi kerek, ony men G-GLOBAL qaǵıdaty dep ataýdy usynamyn», - deıdi Elbasy.
«Egemen Qazaqstan» gazetiniń jazýynsha, keshe Astanadaǵy «Redısson» qonaq úıinde Qazaqstan Respýblıkasynyń Premer-Mınıstri Kárim Másimovtiń jáne Túrik Respýblıkasynyń Premer-mınıstri Rejep Taıyp Erdoǵannyń qatysýymen Qazaq-Túrik bıznes forýmy bolyp ótti. Shara barysynda Qazaqstan Úkimeti basshysy Kárim Másimov quttyqtap, sóz sóıledi. Ol óz sózinde eki týysqan halyqtyń dostyǵynyń tamyry tereńnen bastalatyndyǵyn atap kórsetti. Odan keıin sóz kezegi Túrik Respýblıkasynyń Premer-mınıstri Rejep Taıyp Erdoǵanǵa berildi. «Birinshi kezekte men Túrik Respýblıkasynyń delegatsııasyn ystyq yqylaspen qarsy alyp, jumysymyzdyń jemisti jalǵasýyna jaǵdaı jasaǵany úshin Qazaqstan Respýblıkasynyń Prezıdenti, asa qurmetti Nursultan Nazarbaevqa alǵys sezimimdi bildiremin dedi ol. Biz Astanada ózimizdi qonaq retinde emes, týǵan qalamyzda júrgendeı sezinýdemiz. Týysqan eki halyqtyń dostyq seziminiń qýattylyǵy da osynda. Biz shyn máninde ózimizdiń atamekenimizde júrgen sııaqtymyz», - dedi Túrik Premer-Mınıstri.
***
«Alash aınasy» gazetiniń turaqty «Dat!» aıdarynda Qurylys jáne turǵyn úı-kommýnaldyq sharýashylyq isteri agenttiginiń tóraǵasy Serik Nokınmen aradaǵy suhbat «Qurylysty Eýropalyq bazaǵa kóshirýdiń birden-bir joly salany tehnıkalyq reformalaý» degen taqyryppen berilgen. Basylym tilshisiniń barlyq saýaldaryna tuşymdy jaýap bergen ol: «Qurylysty eýropalyq bazaǵa kóshirýdiń birden-bir joly salany tehnıkalyq reformalaý. Eýrokodtarǵa kóshý ozyq tehnologııalar men ınnovatsııalardy paıdalanýǵa múmkindik beredi. Sondaı-aq elimizdiń aýmaǵynda ınvestıtsııalyq jobalardy iske asyrǵan kezde tehnıkalyq kedergilerdi joıady. Bizdiń jaqyn kórshilerimiz jáne seriktesterimiz Reseı, Ýkraına jáne Belarýs elderi áldeqashan osy jolǵa tústi», - deıdi.
«Qazekem buryndary sharanany shańyraq shattyǵyna balaıtyn edi. Qazir bala sanyn shekteý ádetke aınalyp barady. Degenmen eldiń ishi emes pe, jastar arasynda da kópbalaly ana bolýdy artyq kórmeıtin názikjandylar da kezdesedi. Qyzylorda qalasynyń turǵyny Názıra Sabyrálıeva sondaı áıelderdiń biri bolyp otyr»,- dep jazady «Alash aınasy» basylymy búgingi nómirdegi «26 jastaǵy jeti balanyń anasy nege qamqorlyqtan tys qalyp otyr?» degen taqyryptaǵy maqalasynda. Basylymnyń atap ótýinshe, jeti balany ómirge alyp kelgen Názıra osy kúnderi qalanyń shetki bóliginde páter jaldap turady. Ol osydan eki jyl buryn páter kezegine alynǵan eken. Arada eki jyldaı ótse de, úı kezegi ilgeri jyljıtyn túri joq. Tasbaqa aıańmen alǵa basar emes.
***
«Túrkimen bıligi eldiń buqaralyq aqparat quraldaryna KSRO men Germanııa arasynda bolǵan soǵysqa qatysty «Ul Otan soǵysy» dep atalatyn termındi aıtýǵa tyıym saldy. Endi qalaı ataý qajet?» dep jazady «Aıqyn» gazeti búgingi sanyndaǵy «Soǵysty aıtýǵa tyıym saldy» degen taqyryptaǵy maqalasynda. Basylymnyń atap ótýinshe, 8 mamyr kúniniń erteńinde eldiń Mádenıet mınıstrliginen bul soǵystyń jyldaryn ǵana kórsetip aıtý týraly aýyzsha nusqaý kelip túsken. Sonymen qatar bul buıryqty dabyra etpeý jaǵy da atap kórsetilgen. Sebebi bul másele Kreml bıligine unamaýy múmkin.
***
«Kazahstanskaıa pravda» gazetiniń jazýynsha, Memleket basshysy Nursultan Nazarbaev V Astana ekonomıkalyq forýmy aıasynda Germanııa Federatıvtik Respýblıkasynyń eks-prezıdenti Horst Kelermen kezdesti. Kezdesý barysynda Memleket basshysy men GFR-diń burynǵy prezıdenti forýmnyń kún tártibin talqylady, jahandyq jáne aımaqtyq ekonomıka máselesin qarastyrdy, álemdegi aǵymdaǵy saıası jaǵdaı týraly pikir almasty. Qazirgi ýaqytta Germanııa Qazaqstannyń jetekshi saýda seriktesteriniń qataryna jatady. 2010 jyly ózara saýda kólemi 3,6 mıllıardqa jýyq AQSh dollaryn qurady. Al 2011 jyly atalǵan kórsetkish 2,8 paıyzǵa ósip, 3,7 mıllıard dollarǵa jetti.
