26 jastaǵy tarazdyq boıjetkennen sıntetıkalyq esirtki tabyldy
Jambyl oblysy PD Esirtki qylmysyna qarsy is-qımyl basqarmasynyń qyzmetkerleri Taraz qalasynda jedel-izdestirý is-sharalaryn júrgizý barysynda 26 jastaǵy azamatshany ustady.
Polıtseıler onyń sómkesinen erekshe ıisi bar jasyl tústi untaq zat salynǵan túıinshek taýyp, tárkiledi.
Bul týraly Jambyl oblysy polıtsııa departamentiniń baspasóz qyzmeti xabarlady.
«Saraptama qorytyndysyna sáıkes, anyqtalǵan zat – jalpy salmaǵy 4 gramm «Alfa-PVP» sıntetıkalyq esirtkisi bolyp shyqty. «Alfa-PVP» sıntetıkalyq esirtki zaty júıke júıesine óte qaýipti psıhobelsendi áserin tıgizedi, aǵzany búldirip, tez táýeldilikke alyp keledi»,-delingen vedomstvo habarlamasynda.
Atalǵan derek boıynsha Qylmystyq kodekstiń 296-baby 4-bóligimen sotqa deıingi tergeý amaldary bastaldy.
Bul bapqa sáıkes úsh jyldan jeti jylǵa deıingi bas bostandyǵynan aıyrý jazasy kózdelgen.
