26 jastaǵy saıahatshy Maǵjan Saǵymbaev jer sharyn 20 aıdyń ishinde aınalyp ótpek

Bul týraly búgin Almatyda ótken baspasóz máslıhatynda belgili boldy.

«Men buǵan deıin Almatyda týrızm salasynda qyzmet ettim. Sheteldik qonaqtarǵa elimizdiń ásem jerlerin tanystyratynmyn. Árıne, bul qyzmet meniń búgingi sheshimime yqpal etkeni ras. Jalǵyz ózim jer sharyn velosıpedpen sharlap shyǵýdy uıǵardym. Óıtkeni avtokólikpen tym tez júresiń, al jaıaý - óte baıaý. Men osy saıahat arqyly salamatty ómir saltyn nasıhattaǵym keledi. Jastar sportpen aınalyssa eken, velosıped tepse eken degim keledi. Men osy saıahat barysynda basqa elderdiń salt-dástúrlerimen tanysamyn, tilderin úırenemin. Úlken qalalarda jergilikti turǵyndardyń úıinde, al basqalaı jerlerde kóbinese palatkada ómir súretin bolamyn. Saıahatym jaıly Feısbýktegi paraqshama kúndelikti jazyp otyramyn. Qazaq jaǵrafııalyq qoǵamy kartochkama aqsha salatyn bolady. Árıne, men júrgen jerimde Qazaqstan jaıly, qazaqtyń salt-dástúri, tili, mádenıeti, ulttyq taǵamy jaıly áńgimeleıtin bolamyn»- dedi óz sózinde Maǵjan Saǵymbaev.

Atalmysh jobanyń barlyq shyǵynyn Qazaq jaǵrafııalyq qoǵamy óz moınyna alyp otyr.

Saıahat ázirge jospar boıynsha Eýrazııa, Soltústik Amerıka jáne Avstralııa qurlyǵynyń 18 eli arqyly ótedi. Saıahatshy kúnine 50 shaqyrymnan bastap 170 shaqyrymǵa deıin júrmek. Jol baǵyty jergilikti jaǵdaılarǵa baılanysty ózgerip otyrýy múmkin.

Maǵjan alys saparǵa aldaǵy 1 mamyr kúni Almaty qalasynan attanady.