26 trln dollar: Astana Finance Days forýmyna qandaı ınvestorlar keldi
ASTANA. KAZINFORM – Bıyl toǵyzynshy ret ótip jatqan Astana Finance Days forýmyna álemniń túkpir-túkpirinen 8 myńǵa jýyq qatysýshy tirkeldi. Bul týraly «Astana» halyqaralyq qarjy ortalyǵy ákimshiliginiń ónimder jónindegi bas dırektory Janbolat Kákishev málim etti.
Onyń aıtýynsha, bıylǵy forým Delivering Impact taqyrybymen ótip jatyr. Forýmda AHQO-nyń atqarǵan jumysynyń Qazaqstan ekonomıkasyna qandaı naqty nátıje berip jatqanyna basymdyq beriledi.
– Bıyl biz toǵyzynshy forýmdy ótkizip jatyrmyz. Onyń taqyryby – Delivering Impact, ıaǵnı ekonomıkadaǵy naqty nátıjeler týraly. AHQO shamamen 10 jyl boıy ınfraqurylymdy qalyptastyrý baǵytynda jumys istedi. Qazir ınvestorlardyń qyzyǵýshylyǵy joǵary ekenin kórip otyrmyz jáne túrli ındýstrııalarǵa naqty sheshimder usyna bastadyq. Bastapqyda 7 myńnan astam qatysýshy tirkelgen edi, qazir áriptesterim olardyń sany 8 myńǵa jetkenin aıtyp otyr, - dedi Janbolat Kákishev.
Eki kúnge jalǵasatyn forýmda qarjy naryǵyndaǵy qazirgi máselelermen qatar jańa tehnologııalyq sheshimder talqylanady. Atap aıtqanda, tsıfrlyq teńge, tokenızatsııa, jasandy ıntellektini qarjy sektorynda qoldaný jáne ıslamdyq qarjylandyrý máseleleri kún tártibine shyǵarylǵan.
Janbolat Kákishevtiń sózinshe, forýmǵa álemniń túrli elderinen ınvestıtsııalyq kompanııalar jáne tikeleı ınvestıtsııa qorlary, sondaı-aq iri halyqaralyq kompanııalar kelgen. Olardyń basqarýyndaǵy kapıtaldyń jıyntyq kólemi shamamen 26 trln dollardy quraıdy.
Forýmǵa BlackRock, Brookfield sekildi iri halyqaralyq ınvestıtsııalyq kompanııalardyń ókilderi, sondaı-aq Gonkong, Qytaı, Ulybrıtanııa jáne basqa elderdiń ınvestorlary qatysyp jatyr.
Forýmnyń alǵashqy kúninde ınstıtýtsıonaldyq kapıtalǵa arnalǵan paneldik sessııa ótip, oǵan Gonkongtyń ınvestıtsııalyq qory men Qazaqstanǵa ınvestıtsııa salýǵa qyzyǵýshylyq tanytqan basqa da qorlar qatysty.
Sonymen qatar Astana Finance Days aıasynda taý-ken salasy, kreatıvti ındýstrııa, dástúrli jáne ıslamdyq qarjylandyrý máselelerine arnalǵan sessııalar uıymdastyrylǵan.
Aıta keteıik, buǵan deıin elordada Astana Finance Days 2026 forýmy ótetini, sondaı-aq oǵan 90-nan astam eldiń ókilderi bas qosatyny habarlandy.
