26 tamyzdan bastap Reseıden benzın ákelýge tyıym salynady
2018 jyldyń 3 shildesinde shyqqan «Qazaqstan Respýblıkasyna Reseı Federatsııasynan munaı ónimderin jetkizýdiń keıbir máseleleri týraly» QR Energetıka mınıstriniń buıryǵy 2018 jyldyń 16 tamyzynda «Kazahstanskaıa pravda» gazetinde jaryq kórdi.
Qujatqa sáıkes, Reseıden Qazaqstanǵa temirjol kóligi arqyly benzın tasymaldaýǵa (kod: TN VED 27101241 - 2710125900) úsh aı merzimge tyıym salynady.
Atalǵan buıryq resmı jarııalanǵan sátten 10 kúntizbelik kún ótken soń qoldanysqa engiziledi.
Buǵan deıin QR Energetıka vıtse-mınıstri Bolat Aqsholaqov mundaı tyıymdy Qazaqstan naryǵynda benzınniń shekten tys kóptigimen túsindirgen edi.
«Zaýyttar jańǵyrtylǵannan soń, qazirgi ýaqytta bizde ımporttyq AI-92 benzınine qajettilik múldem joq. Sondyqtan osy otyndy syrttan ákelýge tyıym salmaqpyz. Bul rette reseılik áriptesterimizdi eskerttik, olar bul qadamǵa qarsy emes», - dedi vıtse-mınıstr.
