26 naýryzdan bastap «Úılesim sabaqtary» fılmi Frantsııada kórsetile bastaıdy
ASTANA. QazAqparat - Qazaqstandyq rejısser Emır Baıǵazınniń «Úılesim sabaqtary» fılmi 26 naýryzdan bastap Frantsııa kınoteatrlarynda kórsetile bastaıdy.
Bul týraly Sh.Aımanov atyndaǵy «Qazaqfılm» AQ-nyń baspasóz qyzmetinen habarlady.
Aıta keterligi, bul týyndy ótken jyldyń 26 qyrkúıeginde Avstrııa, 6 naýryzda Portýgalııa kınoteatrlarynda kórsetilgen edi.
Sháken Aımanov atyndaǵy «Qazaqfılm» AQ shyǵarǵan rejısser Emır Baıǵazınniń «Úılesim sabaqtary» fılmi Bazel qalasynda mamyrdyń 29-y men maýsymnyń 2-i aralyǵynda ótken «Bildrausch Film Fest Basel» atty Halyqaralyq kınofestıvalinde úzdik dep tanylyp, fılmniń aty men jas rejısserdiń esimi jazylǵan saqınamen marapattaldy. Atalǵan kınotýyndy ótken jyldyń basynda qazaq kınematografııasy tarıhynda tuńǵysh ret Halyqaralyq Berlın kınofestıvaliniń negizgi baıqaýyna iriktelip alynyp, «Kúmis aıý» júldesine jáne nemistiń iri «Morgen Post» gazeti taǵaıyndaǵan arnaıy syılyqqa qol jetkizgen. Sondaı-aq, «Úılesim sabaqtary» fılmi Nıý-Iork qalasynda ótken Traıbeka festıvalinde «Eń úzdik rejısserlik debıýt» atty arnaıy dıplommen marapattaldy.
Jalpy, atalǵan fılm 50-den astam kınofestıvalge qatysyp, 25-ten astam júldege ıe bolǵan.
