2,6 mln eýro jelge ushty: Semeıde qoqys suryptaý jobasyn prokýratýra tekserip jatyr
SEMEI. KAZINFORM – Abaı oblysynyń mamandandyrylǵan tabıǵat qorǵaý prokýratýrasy Semeıde qoqysty suryptaý jáne bólek jınaý jobasyna qatysty tekseris júrgizýde. Oblys prokýratýrasy baspasóz qyzmetiniń málimetine súıensek, 2020 jyly bastalǵan jobany qala ákimdigi men Ekologııa mınıstrligi qolǵa aldy. Alaıda jobany iske asyrý kezinde qıyndyqtar týyndady.
— Sheteldik kompanııa 2,6 mln eýronyń qural-jabdyqtaryn jetkizgen. Biraq ákimdik óz mindettemelerin oryndamaı, jabdyqtardy ornalastyratyn angardy salmaǵan. Sonyń saldarynan qymbat qural-jabdyqtar eki jyldan astam paıdalanylmaı, ashyq jerde saqtaldy. Bul onyń búlinip, kepildiginiń joǵalýyna ákelip soqty, — delingen habarlamada.
Osyǵan baılanysty prokýratýra QR QK-niń 371-baby 1-bóligi (salaqtyq) boıynsha sotqa deıingi tergeýdi bastady. Ákimdik te jobany aıaqtaý úshin tıisti sharalardy qabyldap jatyr.
Eske salsaq, osyǵan deıin Abaı oblysynda balasyna 44 mln teńge alıment tólemegen adam Reseı azamattyǵyn alyp alǵany habarlanǵan.