2,6 myńnan astam jumysshy Astanany qardan tazartyp jatyr

ASTANA. KAZINFORM — Astanada qar kúreýge 2,6 myńnan astam jol jumysshy men 1,3 myńnan astam arnaıy tehnıka shyqty, dep habarlaıdy Astana ákimdiginiń resmı saıty.

Elordanyń kommýnaldyq qyzmetteri táýlik boıy qar kúreý jumysyn júrgizip jatyr. Qys mezgiliniń basynan bastap olar úzdiksiz kúsheıtilgen rejımde jumys isteýde.

31 jeltoqsan kúni tańerteń qar tazalaý jumysyna 2,6 myńnan astam jol jumysshy men 1346 birlik arnaıy tehnıka shyqty.

31 jeltoqsanǵa qaraǵan túni 1 829 aýyr júk reısimen 24 myń tekshe metrden astam qar shyǵaryldy.

Aıta keteıik, qysqy maýsymnyń basynan bastap polıgondarǵa 157 myńnan astam reıspen 2 042 267 tekshe metr qar shyǵaryldy. Eń aldymen, erejege sáıkes, joldarda keptelis bolmas úshin qozǵalysy óte qarqyndy oryndar tazartylady.

Sondaı-aq, qarqyndylyǵy ortasha ýchaskeler — alańdar, vokzal mańy aýmaqtary, trotýarlar, áleýmettik nysandarǵa kirme joldar jáne t. b. tazartylady.

Ortalyq kóshelerdi, jolaýshylar kóligi marshrýttary júretin oryndardy, aıaldamalar men trotýarlarda tazalaý da basymdyqqa ıe.

Qalada birneshe jabdyqtalǵan qar polıgony bar. Olar samosval tehnıkasynyń nómirlik belgilerin oqý júıesimen jabdyqtalǵan, munda beınebaqylaý kameralary ornatylyp, jaryqtandyrý qosylǵan.

— Elorda turǵyndary men qonaqtarynan joldarda abaı bolýdy, qaýipsizdik erejelerin saqtaýdy, daýyldy eskertý bolǵan jaǵdaıda alys saparlarǵa shyqpaýdy suraımyz. Tótenshe jaǵdaı týyndaǵan kezde «112» nómirine habarlasyńyz, — dep eskertti ákimdik.

Buǵan deıin habarlaǵanymyzdaı, «City Transportation Systems» JShS elordadaǵy qoǵamdyq transporttyń mereke kúnderdegi kestesin jarııalady.