26 myńnan astam pedagog sý tasqynyna qarsy sharalarǵa qatysýda
ASTANA. KAZINFORM – 26 myńnan astam pedagog pen bilim berý salasynyń qyzmetkerleri sý tasqynymen kúreske jumyldyrylǵan. Bul týraly Oqý-aǵartý mınıstrliginiń resmı ókili Mereke Amangeldiqyzy aıtty.
«Oqý-aǵartý mınıstrligi óńirlerde oqý protsesin uıymdastyrý jumystaryn jalǵastyrýda. Mınıstrlik ókilderi Atyraý, Qostanaı, Aqmola, Mańǵystaý jáne Abaı oblystarynyń jaǵdaıymen baryp tanysty. Sý tasqyny bastalǵan ýaqyttan 4 739 bala saýyqtyrý ortalyqtaryna, kolledjder men joǵary oqý oryndarynyń jataqhanalaryna jáne ınnovatsııalyq mektep-lıtseı ınternattaryna ornalastyryldy. Sondaı-aq balalar men ata-analar úshin qosymsha 8 myńǵa jýyq oryn ázirlendi. Oqýshylar qajetti oqý quraldarymen, kıimmen jáne tamaqtanýmen qamtylýda», - dedi ol Ortalyq kommýnıkatsııalar qyzmetindegi brıfıngte.
Onyń dereginshe, sý tasqynynan zardap shekken óńirlerde sapaly bilim berýdi uıymdastyrý úshin joǵary jyldamdyqtaǵy ınternet tartylýda. Qazirgi ýaqytta Qostanaı, Aqtóbe, Ulytaý jáne Shyǵys Qazaqstan oblystary boıynsha 13 mektep Starlink jelisine qosyldy. Bul baǵyttaǵy jumystar jalǵasady.
«26 myńnan astam pedagogter men bilim berý salasynyń qyzmetkerleri sý tasqynyna qarsy sharalarǵa, onyń ishinde jaǵalaýdy bekitý jumystaryna qatysýda. 400-ge jýyq mektep psıhology evakýatsııalyq pýnktterdegi balalar men azamattarǵa psıhologııalyq kómek kórsetýde.
Odan bólek mınıstrliktiń baǵynysty uıymdary men aýmaqtyq departamenteriniń 300-den astam qyzmetkeri balalardyń oqý protsesi men sapaly demalysyn uıymdastyrýda», - dedi mınıstrlik resmı ókili.
