26 myń adam: Qaı sanattaǵy adamdar arnaýly áleýmettik kómek ala alady
ASTANA. KAZINFORM – Qazaqstanda zııandy eńbek jaǵdaılarynda uzaq ýaqyt jumys istegen 26,1 myń jumyskerge arnaýly áleýmettik tólem taǵaıyndaldy. Bul týraly Eńbek jáne halyqty áleýmettik qorǵaý mınıstrligi habarlady.
Vedomstvonyń málimetinshe, 2026 jylǵy 1 maýsymdaǵy jaǵdaı boıynsha tólem alýshylarǵa 24 mlrd teńgeden astam qarajat tólengen. Bul ótken jyldyń sáıkes kezeńimen salystyrǵanda shamamen 3,7 myń adamǵa kóp.
Arnaýly áleýmettik tólem zańnamada belgilengen talaptarǵa sáıkes keletin azamattarǵa taǵaıyndalady. Bul qoldaý sharasy jumyskerlerge zııandy eńbek jaǵdaılaryndaǵy qyzmetin toqtatýǵa nemese eńbek tabysyn saqtaı otyryp, qaýipsiz eńbek jaǵdaılaryndaǵy jumysqa aýysýǵa múmkindik beredi.
– Arnaýly áleýmettik tólem birneshe qarjylandyrý kózi esebinen júzege asyrylady. Onyń quramyna arnaýly kásiptik memlekettik járdemaqy, saqtandyrý tólemderi, jumys berýshilerdiń qarajaty, sondaı-aq mindetti kásiptik zeınetaqy jarnalary esebinen qalyptastyrylǵan tólemder kiredi, – delingen mınıstrlik habarlamasynda.
Mınıstrlik bul qoldaý sharasy óndiristegi zııandy eńbek jaǵdaılarynda uzaq jyl eńbek etken azamattardy qosymsha áleýmettik qorǵaýǵa baǵyttalǵanyn atap ótti.
– Eńbek jáne halyqty áleýmettik qorǵaý mınıstrligi jumyskerlerdi áleýmettik qorǵaý tetikterin odan ári jetildirý jáne eńbek qaýipsizdigi júıesin damytý baǵytyndaǵy jumysty jalǵastyrady, – dep málimdedi vedomstvo.
Aıta keteıik, Astanada zeınetaqy men járdemaqyny rásimdeý jeńildedi.
