26 qazanda Baıqońyrdan «Soıýz-2.1a» zymyran-tasyǵyshy ushyrylady

BAIQOŃYR. QazAqparat - «Baıqońyr» ǵarysh aılaǵynda «Progress MS-21» kóliktik júk kemesin (KJK) ushyrýǵa daıyndyq jumystary aıaqtalýǵa jaqyn, dep habarlaıdy QazAqparat tilshisi.

«Progress MS-21» KJK bar «Soıýz-2.1a» zymyran-tasyǵyshyn Halyqaralyq ǵarysh stantsııasyna (HǴS) ushyrý 2022 jyldyń 26 qazanyna josparlanǵan.

Ǵaryshtyq júk kóligi stantsııaǵa shamamen 2500 kg júkti, sonyń ishinde janarmaı, qosymsha aýyzsý jáne syǵymdalǵan azotty, sondaı-aq 68-shi uzaqmerzimdi ekspedıtsııa ekıpajynyń jumysy men ómirin qamtamasyz etýge arnalǵan 1360 kg túrli jabdyqtar, materıaldar men azyq-túlikti jetkizedi.

Óz kezeginde HǴS da jańa ǵaryshtyq júk kóliginiń kelýine daıyndalyp jatyr. Roskosmostyń baspasóz qyzmetiniń habarlaýynsha, orbıtada jumys istep júrgen ǵaryshkerler Sergeı Prokopev, Dmıtrıı Petelın jáne Anna Kıkına «Progress MS-21» kemesimen aýystyrylatyn «Progress MS-19» júk kemesin HǴS-tan shyǵarýǵa daıyndaýda.

Baıqońyrdan osynyń aldyndaǵy ushyrý bir aı buryn, ıaǵnı 2022 jyldyń 21 qyrkúıeginde ótti. Halyqaralyq ǵarysh stantsııasyna quramynda reseılik ǵaryshkerler Sergeı Prokopev, Dmıtrıı Petelın jáne amerıkalyq astronavt Frenk Rýbıo bar ekıpaj attanǵan bolatyn.