26 qarashada musylmandardyń hıjrı kúntizbesi qaıta bastalady

Bul týraly Qazaqstan musylmandary dinı basqarmasynyń resmı saıtynda habarlandy. Islam tarıhynda Muharram aıy hıjrı jyl sanaýynyń bastaýy sanalady. Sondyqtan bul aıdyń musylmandar úshin mańyzy erekshe. Sondaı-aq osy aıda oraza tutýdyń da saýaby mol.

Paıǵambar (s.ǵ.s.) Mekkeden Mádına qalasyna kóshken - 622 jyl Muharram aıynyń birinshi kúni, aıdyń da, jyldyń da basy edi. Musylmandar Mádınaǵa kelgende ıahýdılerdiń muharram aıynyń onynshy kúni oraza ustaıtynyn baıqaıdy. Paıǵambar (s.ǵ.s.) bul orazanyń mánisin bilý maqsatynda: «Bul qandaı oraza?» dep surady. Sonda olar: «Bul kúnniń biz úshin mańyzy zor. Óıtkeni, Allah taǵala bul kúni Musany (ǵ.s.) dushpannan qutqarǵan. Perǵaýynnyń kózin joıǵan. Musa (ǵ.s.) da osy kúni shúkirshilik retinde oraza tutqan», - dep jaýap bergen eken.

Sonda Allah Elshisi (s.ǵ.s.): «Musaǵa (ǵ.s.) senderden biz jaqynyraqpyz», - dep musylmandarǵa Muharram aıynyń onynshy kúni oraza ustaýǵa ósıet etti. Ol kezde áli Ramazan orazasy paryz etilmegen edi. Kelesi jyly Ramazan aıynyń orazasy paryz etildi. Al Ashýra kúni tutylatyn orazany ár adamnyń erkine qaldyrdy. Osylaısha Ashýra kúni oraza ustaý mustahab saýapty amal bolyp esepteledi.