Qazaqstanda 26 qańtardan bastap taǵy bir avtojol aqyly bolady
ASTANA. KAZINFORM – Qyzylorda men Aral qalalaryn baılanystyratyn avtojol avtobýs pen júk kólikteri úshin aqyly bolady. Bul týraly QazAvtoJol kompanııasy málim etti.
— Qazaqstan Respýblıkasy Kólik Mınıstrliginiń 2025 jylǵy 9-qańtardaǵy № 6 Buıryǵyna sáıkes, Qyzylorda men Aral qalalaryn baılanystyratyn avtojol avtobýs pen júk kólikteri úshin aqyly bolady. Dálirek aıtqanda, ІІ tehnıkalyq sanattaǵy uzyndyǵy 454 shaqyrym jol ýchaskesi aqy alý júıesine 2025 jylǵy 26 qańtardan bastap iske qosylady, — delingen habarlamada.
Respýblıkalyq mańyzy bar «RF shekarasy (Samara) — Shymkent» avtojolynyń «Qyzylorda-Aral» ýchaskesinde 6 baqylaý arka jáne klıenttermen jumys isteıtin ortalyq bar. Arkalarda ornatylǵan kameralar aqyly ýchaskelerde avtomobılderdiń qozǵalysyn, olardyń jyldamdyǵy men qarqyndylyǵyn, joldaǵy jaǵdaıdy jáne t. b. tirkeıdi.
Sondaı-aq, ýchaskedegi jaǵdaıdy kaztoll.kz saıtyndaǵy «Onlaın translıatsııa» bóliminde kórýge bolady.
— Avtojolda tólem beketteri bolmaıdy, onyń ornyna yńǵaıly «ashyq» tólem júıesi qoldanylady. Shlagbaýmdar men ótkizý pýnktteri qoıylmaǵandyqtan keptelister bolmaıdy, bul qosymsha qaýipsizdikti qamtamasyz etip, sapar ýaqytyn qysqartady, — dep habarlady QazAvtoJol kompanııasy.
Jol júrý tólemi qolma-qol aqshasyz júrgiziledi. Paıdalanýshylardyń qolaılyǵy úshin tólem jasaýdyń 10-ǵa jýyq ádisi bar: ınternet-bankıngter, tólem termınaldary men elektrondyq ámııandar, uıaly telefon balansynan, E100 janarmaı kartasy arqyly, jáne zańdy tulǵalarmen kelisim shart jasaý.
Aldyn-ala tólem áldeqaıda arzan bolǵandyqtan, QazAvtoJol tólemaqyny ýaqtyly jasaýǵa keńes beredi.
Bir baǵyttaǵy (454 shaqyrym) tólem mólsheri:
— 16 orynǵa deıingi avtobýstar jáne júk kótergishtigi 2,5 t. deıin júk avtomobılderi úshin aldyn-ala tólem — 2840 teńge, keıingi tólem — 3330 teńge;
— 32 orynǵa deıingi avtobýstar jáne júk kótergishtigi 5,5 t. deıin júk avtomobılderi úshin aldyn-ala tólem — 5750 teńge, keıingi tólem — 6740 teńge;
— 32 orynnan asatyn avtobýstar jáne júk kótergishtigi 10 t. deıin avtopoezdar úshin aldyn-ala tólem — 8570 teńge, keıingi tólem — 10 100 teńge;
— júk kótergishtigi 10 t. joǵary jáne 15 t. deıingi júk avtomobılderi úshin aldyn-ala tólem — 11 470 teńge, keıingi tólem — 13 470 teńge;
— júk kótergishtigi 15 t. joǵary júk avtomobılderi, onyń ishinde tirkelgish jáne ershikti tartqyshtar úshin aldyn-ala tólem — 14 290 teńge, keıingi tólem — 16 830 teńge.
Aıta ketý kerek, jeńil kólik ıeleri Qyzylorda-Aral jolyn tegin paıdalanady. Jergilikti turǵyndar úshin bir aılyq jáne bir jyldyq abonementter qarastyrylǵan.
Jınalǵan qarajat joldyń ózin-ózi qarjylandyrýyn qamtamasyz ete otyryp, memlekettik bıýdjetke túsetin júktemeni azaıtýǵa septigin tıgizedi. Jol qyzmetteri ýchaskeni táýlik boıy patrýldeýdi júzege asyrady jáne jol jabynynyń, jaryqtandyrýdyń, jol belgileriniń aqaýlaryn jedel jóndeıtin bolady.
Sonymen qatar, jol men jol ınfraqurylymyn qoqystan jáne qardan tazartady, qozǵalys qaýipsizdigin qamtamasyz etýdiń jańa júıelerin belsendi túrde engizedi.
Eske sala keteıik, buǵan deıin aqyly joldyń aqshasyn tólemegenderge avtomatty túrde aıyppul salynatynyn jazǵan bolatynbyz.