26 qańtardan bastap elimizdegi 3 avtojol aqyly bolady
ASTANA. QazAqparat - 2019 jyldyń 26 qańtarynda Astana - Temirtaý», «Almaty - Qapshaǵaı», «Almaty-Qorǵas» avtojoldary aqyly tártipke aýysady, dep habarlaıdy QazAqparat Qazavtojolǵa silteme jasap.
Aqyly júıege aýysýy respýblıkalyq mańyzy bar avtojoldardyń sapasyn jaqsartýǵa, apat qaýpin azaıtýǵa, logıstıkalyq dálizderdi jetildirýge yqpalyn tıgizedi.
«2019 jyldyń 26 qańtarynda Astana - Temirtaý» (134 shaqyrym), «Almaty - Qapshaǵaı» (42 shaqyrym), «Almaty-Qorǵas» (295 shaqyrym) avtojoldarynda aqy alý júıesi iske qosylady. Kóliktik ınfraqurylymdy damytý JІÓ arttyrýǵa, avtojoldardy jóndeý men kútip ustaýǵa múmkindik beredi», - dep habarlandy Qazavtojol saıtynda.
Atap ótken jón, aqyly jol bólikterine jaqyn aýdandardyń turǵyndary úshin túsindirý men habarlaý jumystary júrgizilgen. Birqatar qoǵamdyq tyńdaýlar, kóshpeli tanystyrylymdar uıymdastyrylyp, tólem stavkalary týraly turǵyndardyń usynysy tyńdalǵan.
«Aqyly jol bólikterine jaqyn aýdandardyń turǵyndary úshin bir jyldyq abonement baǵasy 1000 teńge bolady. Ony sol mekenjaıda tirkelgen avtokólik ıeleri ǵana ala alady. Eger kólik ıesi ǵana belgilengen mekenjaıda tirkelip, avtokóliktiń tirkelý orny basqa bolsa, tólemaqy jalpy erejelerge sáıkes alynady», - delingen resmı habarlamada.
Jeńil kólik ıeleri Astana-Temirtaý jolynda aldyn ala 200 teńge nemese qolma-qol 400 teńge tólep óte alady. Almaty - Qapshaǵaı jolynda aldyn ala - 100 teńge nemese qolma-qol - 200 teńge bekitilgen. Almaty-Qorǵas jolynda aldyn ala - 300 teńge, qolma-qol 600 teńge tóleý qajet.
