26 aptada týǵan 740 gramm bolǵan sábı ómir úshin kúreste jeńip shyqty
ASTANA. KAZINFORM — Bar bolǵany 740 gramm — júktiliktiń 26-aptasynda dúnıege kelgen sábıdiń salmaǵy osyndaı boldy. Búginde ol anasymen birge úıde. Onyń ómiri úshin Almaty qalasynyń № 2 qalalyq perınataldyq ortalyǵynyń dárigerleri 80 kún boıy kúresti.
Sábı shuǵyl kesar tiligi arqyly dúnıege kelgen. Júktilik platsentanyń ajyraýy jáne qan ketýmen asqynǵan. Júktiliktiń nebári 26 aptasynda ár gramm men árbir tynystyń mańyzy zor boldy.
Ómiriniń alǵashqy mınýttarynan bastap jańa týǵan nárestege qarqyndy medıtsınalyq kómek qajet boldy.
— Sábı 40 kún boıy ókpeni jasandy jeldetý apparatynda boldy. Odan keıin taǵy eki aptaǵa jýyq ýaqyt boıy muryn arqyly SIPAP ádisimen tynys alý qoldaýyn aldy, — deıdi Almaty qalasy № 2 qalalyq perınataldyq ortalyǵynyń dırektory Svetlana Rahımova.
Jalpy alǵanda, kishkentaı patsıent jańa týǵan nárestelerdi reanımatsııalaý jáne qarqyndy terapııa bóliminde 56 kún jatty.
Mundaı balalar úshin ózdiginen tynys alýǵa kóshý, jaǵdaıynyń turaqtanýy jáne úıge shyǵý — naǵyz kúres. Ár kúnniń artynda táýlik boıy baqylaý, nárestelerdi kútip-baptaýdyń zamanaýı ádisteri jáne dárigerler men medıtsına qyzmetkerleriniń orasan zor eńbegi tur.
Balanyń jaǵdaıy jaqsarǵannan keıin ol reanımatsııa bóliminen ári qaraı kútim jasaý jáne ońaltý úshin tıisti bólimshege aýystyryldy.
Sodan keıin kópten kútken kún de jetti. Ómiriniń 80 táýliginde sábı úıine shyǵaryldy.
Salmaǵy nebári 740 gramm bolǵan kishkentaı sábı ómiriniń alǵashqy eń kúrdeli kezeńderiniń birinen ótip, naǵyz kishkentaı jeńimpazǵa aınaldy.
Búginde Qazaqstan jańa týǵan nárestelerge medıtsınalyq kómek kórsetý boıynsha Ortalyq Azııada jetekshi oryndardyń birin ıelenedi.
Dúnıejúzilik bank, DDU, ıÝNISEF, BUU jáne IGME birlesken esebiniń derekterine sáıkes, 2025 jyly elimizdegi neonataldyq ólim deńgeıi (ómiriniń alǵashqy 28 kúnindegi ólim) 1000 jańa týǵan nárestege shaqqanda 3,04 jaǵdaıdy qurady. Bul — óńirdegi eń úzdik kórsetkish jáne AQSh kórsetkishine jýyq.
Zamanaýı perınataldyq tehnologııalar men medıtsına qyzmetkerleriniń kásibı sheberliginiń arqasynda sońǵy jyldary shala týǵan nárestelerdiń ómir súrý kórsetkishi tórt esege artty.
Aıta ketelik Almatyda bir aıda eki úshem dúnıege kelgen edi.
