26 aqpan kúni respýblıkanyń ońtústik aımaǵynda qatty aıaz kútiledi - Qazgıdromet
ASTANA. QazAqparat - 26 aqpan kúni Qazaqstannyń basym bóliginde antıtsıklonnyń yqpaly saqtalady, jaýyn-shashynsyz aýa raıy kútiledi. Tek respýblıkanyń soltústigi pen soltústik-batysynda aýa raıynyń turaqsyzdyǵy saqtalady, qar túsip, jel kúsheıedi, boran soǵyp, jer kóktaıǵaq bolady, tuman túsýi yqtımal, dep habarlaıdy «Qazgıdrometke» silteme jasap QR TJM baspasóz qyzmetinen.
Aqmola, Qostanaı, Soltústik Qazaqstan, Qaraǵandy, kúndiz Pavlodar, Shyǵys Qazaqstan oblystarynyń birqatar jerlerinde boran soǵyp, ekpini 15-20 m/s bolatyn jel soǵady. Jambyl oblysynyń keı jerlerinde tuman túsip, kóktaıǵaq bolady, jeldiń ekpini 15-20 m/s-qa deıin barady. Mańǵystaý oblysynda tuman túsip, jel kúsheıedi. Atyraý oblysynyń keıbir aımaqtarynda jeldiń kúshi 15-20 m/s bolady. Ońtústik Qazaqstan oblysynyń keıbir jerlerinde tuman túsedi. Almaty oblysynda túnde tuman túsip, Jalańashkól aýdanynda jeldiń ekpini 15-20 m/s bolady. Túnde Almaty, Ońtústik Qazaqstan, Jambyl, Qaraǵandy oblystarynyń keı jerlerinde qatty aıaz bolýy múmkin.
