256 mln. teńgeni qoldy etken QR Kólik mınıstrliginiń laýazymdy tulǵalaryna qatysty sot úkimi shyqty
ASTANA. 22 maýsym. QazAqparat - Aǵymdaǵy jylǵy 14 maýsymda Kólik jáne kommýnıkatsııa mınıstrliginiń laýazymdy tulǵalaryna qatysty Qarjy polıtsııasy agenttigimen qozǵalǵan jáne tergelgen qylmystyq istiń sotta qaralýy aıaqtaldy.
Bul týraly Ekonomıkalyq qylmysqa jáne sybaılas jemqorlyqqa qarsy kúres agenttiginiń baspasóz qyzmetinen habarlandy.
Astana qalasynyń Esil aýdandyq sotymen burynǵy kólik jáne kommýnıkatsııa vıtse-mınıstri D. Kúterbekov, Avtomobıl joldary komıteti tóraǵasynyń orynbasary N. Ómirbaev «Batys Eýropa-Batys Qytaı» jobasy boıynsha tehnıkalyq-ekonomıkalyq negizdeme jasaý jumystaryn memlekettik satyp alýdy ótkizý kezinde memleketke 126,8 mln.teńge zalal keltirip, qyzmettik ókilettigin teris paıdalanǵanyna kináli dep tanyldy.
Oǵan qosa Kúterbekov kontsessııalyq jobalar boıynsha keńes berý jumystaryn memlekettik satyp alý kezinde memleketke 129,2 mln.teńge zalal keltire otyryp qyzmettik ókilettigin teris paıdalanǵan dep tanyldy.
Kúterbekovke 3 jylǵa bas bostandyǵynan shartty túrde aıyrý jazasy taǵaıyndaldy.
Ómirbaev 3 jyl bas bostandyǵynan aıyrýǵa sottaldy, alaıda «Qazaqstan Respýblıkasy táýelsizdiginiń jıyrma jyldyǵyn toılaýǵa baılanysty raqymshylyq týraly» zańynyń 4 babyna sáıkes ol jazadan bosatyldy.
Azamattyq avıatsııa komıtetiniń burynǵy tóraǵasy M. Kýbaev QR azamattyq avıatsııa salasynyń eýropalyq standarttarǵa ótý boıynsha is-sharalar josparynyń 2-kezeńin júzege asyrý jumystaryn memlekettik satyp alý kezinde qyzmettik ókilettigin teris paıdalanǵan dep tanylyp, oǵan 3 jylǵa bas bostandyǵynan aıyrý jazasy taǵaıyndaldy. Alaıda «Qazaqstan Respýblıkasy táýelsizdiginiń jıyrma jyldyǵyn toılaýǵa baılanysty raqymshylyq týraly» zańynyń 4 babyna sáıkes ol jazadan bosatyldy.
Sonymen birge «AzııaMegaTranzıt» JShS basshysy B. Syzdyqov pen «Legal EXPERT KAZAKHSTAN» JShS basshysy B. Aıtýkenova «Batys Eýropa-Batys Qytaı» jobasy boıynsha tehnıkalyq-ekonomıkalyq negizdeme jasaýǵa, QR azamattyq avıatsııa salasynyń eýropalyq standarttarǵa ótý boıynsha is-sharalar josparynyń 2-kezeńin júzege asyrý jáne kontsessııalyq jobalar boıynsha keńes berý men salalyq master-josparlardy jasaýǵa bólingen jalpy sommasy 575 mln.teńge bıýdjet qarajatyn alaıaqtyq jolmen urlaǵan dep sotpen tanyldy.
Syzdyqov pen Aıtýkenova árbireýi múlkin tárkileýmen 6 jylǵa bas bostandyǵynan aıyrýǵa sottaldy.
