251 mln teńge sýbsıdııa jymqyryldy degen kúdik: BQO-da jalǵan qujatpen aqsha alyp, úı satyp alǵan
ASTANA. KAZINFORM — Qarjylyq monıtorıng agenttiginiń Batys Qazaqstan oblysy boıynsha departamenti agroónerkásip keshenin damytý baǵdarlamasyna bólingen bıýdjet qarjysynyń jymqyrylǵanyn anyqtady.
Tergeý málimetinshe, kúdikti óziniń baqylaýyndaǵy «Agrokompleks ARSEN» jáne «OnegeAgroServıs» JShS-leri arqyly Jánibek aýdanynyń Kúıgenkól aýyldyq okrýginde sý únemdeıtin sýarý júıelerin salýǵa jumsaldy degen shyǵyndy óteý úshin ýákiletti organǵa ınvestıtsııalyq sýbsıdııa alýǵa qajetti qujattardy tapsyrǵan.
Shyǵyndy rastaý úshin jalǵan tólem tapsyrmalary men oryndalǵan jumys aktileri usynylǵan.
Agenttiktiń málimetinshe, osy qujattardyń negizinde kúdiktiniń baqylaýyndaǵy seriktestikterdiń esepshottaryna jalpy somasy 251 mln teńge ınvestıtsııalyq sýbsıdııa aýdarylǵan. Keıin bul aqsha qolma-qol aqshaǵa aınaldyrylǵan. Qarajattyń bir bóligine turǵyn úı satyp alynǵan.
Sottyń ruqsatymen atalǵan múlikke tyıym salyndy.
Tergeý jalǵasyp jatyr.
QR Qylmystyq-protsestik kodeksiniń 201-babyna sáıkes ózge málimetter jarııa etilmeıdi.
