251 qazaqstandyqqa «Bolashaq» stıpendııasy taǵaıyndaldy
ASTANA. QazAqparat - Shetelde kadrlar daıarlaý jónindegi respýblıkalyq komıssııa 251 qazaqstandyqqa «Bolashaq» stıpendııasyn taǵaıyndaý týraly sheshim shyǵardy, dep habarlaıdy «QazAqparat» HAA «Bolashaq» Halyqaralyq baǵdarlamalar ortalyǵy AQ-ǵa silteme jasap.
2017 jyly «Bolashaq» baǵdarlamasy boıynsha 600 stıpendııa bólingen. Respýblıkalyq komıssııanyń eki otyrysynyń qorytyndylary boıynsha sonyń 251-i óz ıesin tapty.
«Bolashaq» halyqaralyq stıpendııasyn alýǵa aǵymdaǵy jyldyń 29 mamyrynan 16 qarashasyna deıin qujat qabyldandy. Stıpendııa taǵaıyndaý jónindegi konkýrs 5 maýsymda bastalyp, 20 jeltoqsanǵa deıin ótkiziledi.
Shetelde kadrlar daıarlaý jónindegi Respýblıkalyq komıssııanyń «Bolashaq» baǵdarlamasy boıynsha stıpendııalar taǵaıyndaýǵa arnalǵan kelesi otyrysy jeltoqsannyń basynda ótedi.
