2500 orynǵa arnalǵan mekteptiń úlgilik jobasy ázirlenip jatyr - Álıhan Smaıylov
«Mınıstrlik (Bilim jáne ǵylym mınıstrligi) 2018 jyly orta bilim berý nysandaryn jobalaý kezinde qurylys normalaryn qaıta qaraý jumysyn bastady. Osy kezeńde múddeli memlekettik organdardyń qatysýymen 3000 oqýshyǵa arnalǵan mektep salý, 5 qabatty mektep ǵımarattaryn salý, jer ýchaskeleriniń alańy boıynsha talaptardy qaıta qaraý jáne basqa da máseleler pysyqtaldy», - delingen Á. Smaıylovtyń depýtattyq saýalǵa bergen jaýabynda.
Onyń aıtýynsha, bıyl qurylys normalaryna ózgerister engizý boıynsha qosymsha usynystar tizbesi qalyptastyryldy (ǵımarattardyń alańy, oqý jabdyǵymen jaraqtandyrý, oqý kabınetteri boıynsha).
«Sonymen qatar, qazirgi kezde Indýstrııa jáne ınfraqurylymdyq damý mınıstrliginiń Qurylys jáne turǵyn úı-kommýnaldyq sharýashylyq isteri komıteti 2500 orynǵa arnalǵan mekteptiń úlgilik jobasyn ázirleýde. Jalpy, atalǵan baǵyttardaǵy jumys jalǵasýda jáne Úkimettiń turaqty baqylaýynda», - dedi Á. Smaıylov.
Aıta keteıik, Álıhan Smaıylov elimizde salynatyn jańa mektepterge qatysty túsinik berdi. 1000 mekteptiń qurylysy boıynsha problemalyq máselelerge qatysty sizderdiń depýtattyq saýaldaryńyzǵa mynany habarlaımyn. Qazirgi kezde Memleket basshysynyń tapsyrmasyna sáıkes 2025 jyldyń sońyna deıin keminde 1000 mektep salý boıynsha óńirler bólinisinde jol kartasy ázirlenýde. 2021 jyly 1000 mekteptiń 200-in, onyń ishinde nysanaly qurylys esebinen 163 mektepti, jan basyna qarjylandyrý tetigi esebinen 31 jekemenshik mektepti, memlekettik-jekeshelik áriptestik (MJÁ) aıasynda 6 mektepti paıdalanýǵa berý josparlanǵan.
Eske sala keteıik, bıyl qazan aıynda Parlament Májilisiniń jalpy otyrysynda depýtat Juldyz Súleımenova jańa mektepter qurylysyna kedergi bolatyn túıindi máselelerdi kóterdi.
Osy oraıda depýtat QR Premer-Mınıstriniń birinshi orynbasary Álıhan Smaıylovtyń atyna saýal joldady.