250 myń áıel Aýǵanstandaǵy qantógisti toqtatý úshin BUU-ǵa úndeý joldady
ASTANA. QazAqparat - Aýǵanstandaǵy 250 myń áıel BUU Bas hatshysy Pan Gı Mýnǵa eldegi zorlyq-zombylyqqa núkte qoıý úshin úndeý joldady.
Bas hatshy bolsa, bastamaǵa qoldaý bildire kele, osy úndeý Qaýipsizdik Keńesi qararynyń rýhyna saı keletinin, sondaı-aq Aýǵanstan halqy óz jerinde beıbitshilikti talap etip otyrǵandyǵyn atap ótti. Aıta keteıik, názik jandylardyń úndeýi osy eldegi prezıdenttik saılaýǵa daıyndyq aıasynda qaýipsizdik jaǵdaıynyń kúrdelene túsýine oraı joldanyp otyr. Bir aptada bul memlekette lańkestik áreketter saldarynan 50-den astam adam ajal qushty. Onyń ishinde Farıab provıntsııasy bazaryndaǵy jarylystan 15 adamnyń ómiri qıyldy. Sonymen qatar jaqynda Kabýldegi qonaqúıge shabýyl jasaldy, dep jazady ITAR-TASS.
