250 myń kórermen: Qazaqstan tarıhyndaǵy eń aýqymdy Shahterler kúni Qaraǵandyda atalyp ótti
QARAǴANDY. KAZINFORM – 29 tamyzda Qaraǵandy Qazaqstandaǵy Shahterler kúnin merekeleý tarıhyndaǵy eń iri mýzykalyq sharalardyń birine kýá boldy. Oblys ortalyǵynda Qarmet kompanııasy uıymdastyrǵan aýqymdy merekelik kontsert ótip, oǵan aldyn ala málimet boıynsha shamamen 250 myń adam qatysty.
Shahterler kúnin atap ótý tarıhynda alǵash ret jańa alań Qaraǵandy óńiriniń turǵyndaryn ǵana emes, elimizdiń ózge oblystarynan kelgen qonaqtar men sheteldik meımandardy da bir arnaǵa toǵystyrdy. Júzdegen myń adam Qaraǵandyǵa kenshiler shaharlary úshin aıryqsha máni bar merekeni birge atap ótip, táýelsiz Qazaqstan tarıhyndaǵy eń aýqymdy Shahterler kúniniń kýási bolý úshin jınaldy.
Birneshe saǵat ishinde Qaraǵandynyń jańa alańy alyp kontsert sahnasyna aınaldy. Bir sahnada Dequine, Moldanazar, Qaırat Nurtas, Dıma Bılan jáne Dımash Qudaıbergen óner kórsetti. Ár býynnyń talǵamynan shyǵatyn ártúrli mýzykalyq baǵyttaǵy ónerpazdar merekelik keshtiń mazmunyn baıytyp, kórermenge umytylmas áser syılady.
Zamanaýı sahna, qýatty dybys, jaryq pen mýltımedııalyq sheshimder kontserttiń joǵary deńgeıde ótýine múmkindik berdi. Alaıda keshtiń aýqymyn aıqyndaǵan basty kórsetkish – kórermen sany. Shamamen 250 myń adam bir mezette kontsertti tamashalap, tarıhı merekelik sharanyń bir bóligine aınaldy.
Kórermenderdiń erekshe yqylasyna Dıma Bılannyń óner kórsetýi bólendi. Tanymal ánshi qaraǵandylyqtarǵa ystyq yqylasy men jyly qabyldaýy úshin alǵys aıtyp, alańdaǵy erekshe kóńil kúıge toqtaldy.
– Bul alańdaǵy erekshe energııany sózben aıtyp jetkizý múmkin emes. Osyndaı aýqymdy ári ystyq yqylaspen qarsy alǵan Qaraǵandyǵa jáne barsha kórermenge alǵysym sheksiz. Shahterler kúni qutty bolsyn! – dedi Dıma Bılan.
Bul keshte kórermenderdiń taǵatsyzdana kútken sátteriniń biri – álemge tanymal qazaqstandyq ónerpaz Dımash Qudaıbergenniń sahnaǵa shyǵýy boldy. Onyń ónerin tamashalaý úshin alańǵa jınalǵan myńdaǵan kórermen erekshe yqylasyn bildirdi.
– Kóp raqmet, qurmetti aǵaıyn! Bul óte keremet! Kenshiler kúni qutty bolsyn! – dedi Dımash Qudaıbergen.
Mundaı aýqymdy sharany Qaraǵandy buryn-sońdy kórgen emes. Bir mezette shamamen 250 myń adam eldiń eń erjúrek ári jaýapty mamandyqtarynyń biri – kenshi eńbegine arnalǵan ulan-asyr merekeniń ortasynda bas qosty.
Merekelik sharalar óndiris oryndarynyń jumysshylaryn, sala ardagerlerin, olardyń otbasylaryn, óńir turǵyndary men qonaqtaryn bir shańyraq astyna jınady. Bul keshtiń máni rekordtyq kórsetkishtermen ǵana ólshengen joq. Eń bastysy – eldiń óndiristik áleýetin qalyptastyrǵan jáne búginde de eselep otyrǵan eńbek adamdaryna degen qurmet pen jurtty uıystyrǵan birlik rýhy aıqyn sezildi.
Ken óndirisimen bite qaınasqan Qaraǵandy úshin Shahterler kúniniń orny bólek. Ondaǵan jyldar boıy elimizdiń kenshiler astanasy dep atalyp kele jatqan shaharda bul mereke eńbek dástúri men urpaq sabaqtastyǵynyń sımvolyna aınalǵan. Sondyqtan bıylǵy aýqymdy merekelik baǵdarlama óńir turǵyndarynyń birneshe býynyn ortaq qýanyshqa biriktirgen aıtýly oqıǵa boldy.
Aıta ketý kerek, jergilikti atqarýshy organ, polıtsııa, qutqarýshylar men medıtsına qyzmetkerleriniń jumyla jasaǵan jumystarynyń arqasynda merekelik kesh oqys oqıǵalarsyz, oıdaǵydaı ótti.
Keshtiń sharyqtaý shegi aýqymdy otshashýmen jalǵasty. Túrli túske boıalǵan otshashý Qazaqstannyń shahterler astanasy atanǵan Qaraǵandynyń túngi aspanyn jarqyratyp, shırek mıllıonnan astam adamdy biriktirgen tarıhı merekege áserli núkte qoıdy.
Júzdegen myń kórermen. Bir qala. Bir alań. Bir úlken mereke. Shahterler kúni Qaraǵandyda alǵash ret dál osyndaı keń kólemde atalyp ótti.
Osylaısha Qaraǵandy Qazaqstannyń basty shahterler ortalyǵy retindegi mártebesin taǵy bir márte aıqyndady. Al Shahterler kúni óńirdegi ǵana emes, el kólemindegi máni zor, jurtty ortaq qýanyshqa uıystyratyn aýqymdy merekelerdiń biri ekenin kórsetti.
Qarmet kompanııasy barsha shahterlerdi, sala ardagerlerin jáne Qaraǵandy oblysynyń turǵyndaryn Shahterler kúnimen quttyqtaıdy!
