250 adam 300 mln teńge salǵan: QMA «Buyers Union» qarjy pıramıdasynyń jumysyn toqtatty

ASTANA. KAZINFORM - 2025 jylǵy 26 aqpan kúni Qarjylyq monıtorıng agenttigi keń aýqymdy operatsııa júrgizip, tutynýshylyq kooperatıv retinde jasyrylǵan «Buyers Union» qarjy pıramıdasynyń qyzmetin toqtatty.

Qarjylyq monıtorıng agenttigi baspasóz qyzmetiniń habarlaýynsha, salymshylardy jyljymaıtyn múlik, kólik satyp alýǵa jáne Trade in jáne ReFinance baǵdarlamalaryna qatysyp ınvestıtsııa salýǵa úgittegen.

Sonymen qatar, kooperatıv jeke tulǵalardyń qarajatyn tartýdan dıvıdendter alý múmkindigimen menedjer bolyp jumys isteýge múmkindik bergen.

Kooperatıvke qatysýdyń mindetti sharttarynyń biri ómirdi saqtandyrý úshin aı saıyn 30 myń teńge tóleý jáne satyp alynatyn múliktiń qunynan 10%-dyq jarna tóleý bolǵan.

Mańyzdysy, kooperatıv salymshylarǵa aqsha alǵany týraly eshqandaı qujattardy usynbaǵan, al salym somasy tek paıdalanýshylardyń jeke kabınetinde kórsetilgen.

Nátıjesinde, pıramıdaǵa 250-den astam salymshy tartylyp, 300 mln teńgeden astam qarajat salǵan.

Pıramıda uıymdastyrýshysy eki aıǵa qamaýǵa alyndy.

Sotqa deıingi tergeý jalǵasýda.

- QR Qylmystyq is júrgizý kodeksiniń 201-babyna sáıkes basqa aqparat jarııa etýge jatpaıdy, - delingen habarlamada.

Osyǵan deıin Shymkentte 4 myńnan astam adamdy aldap soqqan qarjy pıramıdasy anyqtalǵanyn habarlaǵanbyz.