25 jylda «Bolashaq» baǵdarlamasy boıynsha qansha stıpendııa taǵaıyndaldy
ASTANA. QazAqparat - «Bolashaq» baǵdarlamasy júzege asyrylǵan 25 jyldyń ishinde 12831 stıpendııa taǵaıyndaldy, dep habarlaıdy QazAqparat «Halyqaralyq baǵdarlamalar ortalyǵy» AQ baspasóz qymetine silteme jasap.
Baǵdarlama alǵash qolǵa alynǵan 1994-2004 jyldar aralyǵynda - 785, al 2005-2007 jyldary - 12046 stıpendııa berilgen. Stıpendııa taǵaıyndalǵan ýaqyttan beri 10 myńnan astam maman daıyndaldy. Álemniń 35 eliniń 200-den astam jetekshi joǵary oqý orny baǵdarlamanyń strategııalyq seriktesine aınaldy.
Qazirgi ýaqytta shetelde 1209 adam bilim alyp jatyr, olardyń 14-i bakalavrıat baǵdarlamasy, 1021-i magıstratýra, 118-i doktarantýra, 2-eýi aspırantýra boıynsha. Sondaı-aq 54 adam taǵlymdamadan ótýde. Stıpendıanttardyń 46,2% Ulybrıtanııanyń, 35,8% AQSh pen Kanadanyń, 5,2 % Eýropa elderiniń, 4,9% Azııa men Muhıt jaǵalaýy elderiniń jáne 5% Reseı Federatsııasynyń joǵary oqý oryndarynda bilim alýda.
«Búginde «Bolashaq» halyqaralyq stıpendııasynyń ıegerleri Times Higher Education, QS jáne Academic Ranking of World Universities halyqaralyq akademııalyq reıtıngterdiń nusqasy boıynsha álemniń eń aldyńǵy qatarly joǵary oqý oryndary men ǵylymı ortalyqtarynda oqyp jatyr», - delingen habarlamada.
Baǵdarlama arqyly álemniń joǵary oqý ornyn bitirip kelgen 10 myń túlektiń 5 myńy magıstr, shamamen 3 myńy bakalavr, 300-den astamy PhD doktory dárejesin alǵan. Sonymen qatar 1800-ge jýyq maman taǵlymdamadan ótip kelgen. Túlekterdiń 40% astamy ekonomıkanyń shynaıy sektorynda, 20% bilim jáne ǵylym, 7% medıtsına jáne densaýlyq saqtaý salasynda jumys isteıdi.
«Bolashaqtyqtardyń enshisinde qoldanbaly sıpatqa ıe júzdegen ǵylymı ázirlemeler, bilim, densaýlyq saqtaý, mádenıet pen ınjınırıngti damytý salalaryndaǵy 100-den astam iri áleýmettik joba bar. Júrekke 26 myńnan astam operatsııa jasaldy jáne 1700-den astam emdeýdiń halyqaralyq standarttary men algorıtmderi engizildi», - dep atap ótedi ortalyqtyń baspasóz qyzmeti.
«Bolashaq» halyqaralyq stıpendııasy Qazaqstan Respýblıkasynyń Prezıdenti Nursultan Nazarbaevtyń 1993 jylǵy 5 qarashadaǵy qaýlysymen qurylǵan.
