25 jylda 1 mıllıonnan astam otbasy baspanaly boldy
ASTANA. QazAqparat - Qazaqstanda 25 jylǵa jýyq merzimniń ishinde 113,2 mln. sharshy metr turǵyn úı salyndy. Bul týraly búgin QR Úkimeti otyrysynda QR Ulttyq ekonomıka mınıstri Qýandyq Bıshimbaev málim etti.
«Memlekettiń azamattardy turǵyn úımen qamtamasyz etý jónindegi saıasaty oń nátıje berip otyr. 25 jylǵa jýyq merzimniń ishinde 113,2 mln. sharshy metr turǵyn úı salyndy. Bul 1 mıllıonnan astam otbasyn turǵyn úımen qamtamasyz etýge múmkindik berdi. Turǵyn úımen qamtamasyz etý deńgeıi bir adamǵa shaqqanda 14,2 sharshy metrden 21 sharshy metrge deıin ósti. Osy salaǵa tartylǵan ınvestıtsııa 1994 jyldan bastap 2015 jylǵa deıin 14,5 mlrd. teńgeden 739,9 mlrd. teńgege deıin ósti», - dedi ol.
Mınıstr alǵa tartqan derekterge qaraǵanda, 2016 jylǵy qańtar-tamyzda barlyq qarjylandyrý kózderiniń esebinen turǵyn úıdi iske qosý ótken jyldyń osyndaı kezeńimen salystyrǵanda 14 paıyzǵa ósti. Paıdalanýǵa berilgen kóp páterli turǵyn úılerdiń alańy 26,7 paıyzǵa artty. Memlekettiń qarajaty esebinen turǵyn úı salý qarqyny da saqtalyp, 507 myń sharshy metr turǵyn úı salyndy.
«Qabyldanyp jatqan sharalardyń nátıjesinde óziniń turǵyn úı jaǵdaılaryn jaqsartqysy keletin azamattardyń sany ósti. Sonymen, 2014 jylmen salystyrǵanda Turǵyn úı qurylys jınaq banki salymshylarynyń sany 430 myńnan 709 myńǵa deıin ósti», - dedi Q.Bıshimbaev.
