25 jyl ishinde Qazaqstanǵa 957 myń oralman keldi
QR Densaýlyq saqtaý jáne áleýmettik damý mınıstrliginiń baspasóz qyzmetinen habarlaǵandaı, Qazaqstanǵa kelgen oralmandardyń kópshiligi, ıaǵnı, 61,6% - Ózbekstannan kelgen, sondaı-aq, 14,2% - Qytaıdan, 9,2% - Mońǵolııadan, 6,8% - Túrikmenstannan, 4,6% - Reseıden jáne 3,6% - ózge elderden oralǵan qandastarymyz.
Olardyń 21,2% - Ońtústik Qazaqstan oblysyna, 16,3% - Almaty oblysyna, 13% - Mańǵystaý oblysyna, 9,4% - Jambyl oblysyna, 40,1% - elimizdiń ózge óńirlerine qonystandy.
Elge oralǵan qandastarymyzdyń 55,6% - eńbekke qabiletti jasta bolsa, 18 jasqa deıingileri - 39,9%, zeınetkerler - 4,5% quraıdy.
Eńbekke jaramdy oralmandardyń 8,8%-nyń joǵarǵy bilimi bar bolsa, 20,6%-ynda orta arnaýly bilim bar, 60,8% - jalpy orta bilimi bar azamattar, al 9,8%-niń bilimi joq.
Esterińizge sala keteıik, 24 qarashada Elbasy Ult jospary - bes ınstıtýtsıonaldyq reformany júzege asyrý jónindegi 100 naqty qadamnyń kóshi qon men halyqty jumyspen qamtý salalaryn ári qaraı jetildirýdi júzege asyrýǵa baǵyttalǵan «Keıbir zańnamalyq aktilerge halyqtyń kóshi-qony jáne jumyspen qamtylýy máseleleri boıynsha ózgerister men tolyqtyrýlar engizý týraly» QR Zańyna qol qoıǵan bolatyn.
Zańda etnıkalyq qazaqtardy tarıhı otanyna oralýyn yntalandyrý maqsatynda:
- etnıkalyq qazaqtarǵa qonystaný óńirine qaramastan oralman mártebesin berý. Olarǵa sheteldik azamattarǵa qaraǵanda kóshi-qon polıtsııasyna habarlasý arqyly tólem qabiletin rastaýsyz ýaqytsha turý yqtııarhatyn alý múmkindigi beriledi;
- etnıkalyq qazaqtarǵa Úkimet belgilegen óńirlerge qonystanǵan jaǵdaıda áleýmettik paket berý. Sondaı-aq, elimizdiń kez kelgen óńirinen Úkimet aıqyndaǵan ekinshi óńirge qonystanǵan oralmannyń áleýmettik qoldaýdy alýǵa múmkindigi bolady. Eger olar qonystanǵan óńirden 5 jyl merzimnen buryn qonys aýdaryp ketetin bolsa, alǵan kómekterin Úkimetke qaıtarý mindetteri qarastyrylǵan.
- oralmandarǵa Qazaqstan Respýblıkasynyń azamattyǵyn berý merzimin ýaqytsha turý yqtııarhatyn alǵannan keıin 1 jylǵa deıin qysqartý kózdeledi.
