25 jastaǵy rejısserdiń «Dombyra» fılmi halyqaralyq festıvalde úzdik boldy
ALMATY. QazAqparat– Qazaqstandyq jas rejısser Ramazan Halıollanyń «Dombyra» fılmi Nıý-Delı qalasynda ótken 8-shi Halyqaralyq qysqametrajdy fılmder kınofestıvalinde (Delhi Shorts International Film Festival) júldeli boldy, dep habarlaıdy QazAqparat tilshisi.
«Qazaqfılm» AQ-nyń baspasóz qyzmetinen málim etkendeı, kartına «Úzdik fılm» atalymynda jeńimpaz atandy.
QR Mádenıet jáne sport mınıstrliginiń tapsyrysy boıynsha, Sh.Aımanov atyndaǵy «Qazaqfılm» AQ-nyń «Debıýt» shyǵarmashylyq-óndiristik birlestigi túsirgen kınofılm dombyranyń qulaǵynda oınap, úlken sahnada óner kórsetýdi armandaǵan Áset esimdi balanyń ómirin baıandaıdy.
Aıta ketsek, atalǵan týyndy bıyl Almatyda ótken «Baiqonyr ISFF» IV Halyqaralyq kınofestıvaliniń konkýrstan tys baǵdarlamasynda kórsetilip, «Brodveıdiń tańdaýy» syılyǵyn aldy.
Nıý-Delıdegi DSIFF halyqaralyq kınofestıvali alǵash ret 2012 jyly ótken bolatyn. Uıymdastyrýshysy – Miniboxoffice úndi kompanııasy. Bıyl festıvaldiń halyqaralyq qazylar alqasyn ıspan rejısseri Vıktor Manýel Lopesmýnos basqardy. Sonymen qatar, qazylar alqasy quramynda: prodıýser Vıktorııa Sıl (Japonııa), rejısser Rakel Rýız (Argentına), rejısser Prashant Segal (Úndistan) boldy.
Ramazan Halıolla 1994 jyly 15 mamyrda Qaraǵandy oblysy, Balhash qalasynda dúnıege kelgen. 2012-2017 jyldar aralyǵynda Nursultan qalasyndaǵy Qazaq ulttyq óner ýnıversıtetinde «Rejısser, kıno jáne telearna prodıýsseri» mamandyǵy boıynsha oqyǵan.
