25 jastaǵy qazaqstandyq baǵdarlamashy eńbegimen tapqan 2 mln. dollardy halyqaralyq obyrǵa qarsy kúres ortalyǵyna aýdardy

ASTANA. QazAqparat - Іri banktik Barclays toby aqparatynyń 50 petabaıtymen jumys istegen qazaqstandyq baǵdarlamashy óziniń 2 mıllıon gonoraryn obyrmen kúreske járdemdesetin zertteýge berdi. Aýqymdy jobalarǵa qatysýshy Ashat Murzabaev odan tys daryndy qazaqstandyqtardy izdep, úzdik kompanııalarǵa jumysqa ornalastyrý jónindegi startap - HiPO.kz-tiń negizin qalaýshy.

Onyń maqsaty - Qazaqstandaǵy barlyq «haıperlerdi» (high potential - áleýeti joǵary adamdar) bir alańǵa jınap, olarǵa eńbek naryǵyndaǵy úzdik múmkindikterdi berý. Shynymdy aıtsam, jobadaǵy basty maqsatym aqsha emes, men jańa tájirıbe, jańa tanystyq, jańa bilimge umtylys ústinde júretin janmyn. Bizde birde bank top-menedjerleri men bankırler aqshany qaıda jumsaıdy degen áńgime týdy. Kópshiligi: sıgaret, túngi klýb, ıahta t.b. dep oılaıdy. Alaıda Barclays komandasyndaǵylardyń kópshiligi salaýatty ómir saltyn ustanady, marafonda júgiredi, erikti retinde kómek qolyn sozady jáne t.b. Negizinen, bul kezdesýde osy gonorarymdy álemdik mańyzy bar bir paıdaly iske jaratam dedim. Men aqshany obyr salasyndaǵy zertteýmen aınalysatyn halyqaralyq uıymǵa aýdardym. Top-menedjerler meniń ár fýntyma ózderiniń 2 fýnttaryn ústinen qosatyndaryn aıtty.

Álemdegi eń kúrdeli problemalardyń biri - obyr dep oılaımyn. Muny aýrýhana kereýetin ulǵaıtýmen sheshý múmkin emes, onkologııada onyń sebebin, aýrýdy bastapqy kezeńde anyqtaý asa mańyzdy.

Kezinde doktorantýraǵa baryp kórgim kelgen. Biraq bul asa kúrdeli jol. Obyrdy zerdeleý úshin zerthanalarda kún-tún ótkizip, tereń, tynymsyz eńbek etý qajet. Ómirin osyndaı jumysqa arnaǵan adamdardy erekshe qurmetteımin. Olar myqty adamdar, sondyqtan da olardy qoldaǵym keldi. Álemde ǵylymǵa kóp aqsha bóline bermeıdi. Óz tarapymnan adamzattyń jahandyq problemalaryn sheshýge ómirlerin sarp etip júrgen jandarǵa qarjylaı kómek kórsetkim keldi.