25 jastaǵy elorda turǵyny bir túnde úsh ret urlyqqa túsken

NUR-SULTAN. QazAqparat - Krımınaldyq polıtsııa qyzmetkerleri jedel izdestirý sharalaryn júrgizý kezinde birneshe urlyq jasady degen kúdikpen buryn sottalǵan 25 jastaǵy elorda turǵynyn ustady, dep habarlaıdy QazAqparat tilshisi Nur-Sultan qalalyq Polıtsııa deparatmentiniń baspasóz qyzmetine silteme jasap.

Tergeý barysynda ustalǵan azamattyń túngi ýaqytta terezeni buzyp kirip, úı-jaıdan aqsha urlaǵany anyqtaldy.

Ol bir dúkennen 7 myń teńge urlaǵan. Bul oǵan jetkiliksiz bolǵandyqtan ustalǵan azamat ashana ornalasqan kórshi ǵımaratqa bet alǵan. Úı-jaıǵa kirip, ol 20 myń teńge somasynda qolma-qol aqsha urlaǵan. Biraq jas jigitke bul da jetkiliksiz bolyp, ol kelesi dúkenge qaraı bettegen. Ol dúken terezesin buraǵyshtyń kómegimen burap ashyp, ol jerden 6 myń teńge urlap ketken.

Polıtsııa qyzmetkerleriniń kómegimen ustalǵan kúdikti óz kinásin moıyndady.

Atalǵan fakti boıynsha QR QK «Urlyq» baby boıynsha qylmystyq is qozǵaldy, onyń osyǵan uqsas buryn jasalǵan qylmystarǵa qatysy bar-joǵy anyqtalýda.

Nur-Sultan qalasynyń polıtsııa departamenti saq bolýǵa, keńseler men dúkenderdiń bólmelerin beınebaqylaý kameralarymen jabdyqtaýǵa keńes beredi.