25 tamyzdan bastap kólik júrgizýshileri úshin ne ózgeredi
ASTANA. KAZINFORM - Іshki ister mınıstrligi «Jol júrisi týraly» zańǵa engizilgen ózgeristerdi túsindirdi.
Іshki ister mınıstrligi 2026 jylǵy 25 tamyzdan bastap Qazaqstan Respýblıkasynyń «Jol júrisi týraly» zańyna engizilgen ózgerister kúshine enetinin habarlady.
Vedomstvo ókilderi áń áýeli 65 jastan asqan júrgizýshiler men múgedektigi bar júrgizýshiler eki jylda bir ret mindetti medıtsınalyq tekserýden ótýi qajet ekenin eske saldy.
— Mindetti medıtsınalyq tekserýden ótkeni týraly málimetter Densaýlyq saqtaý mınıstrligi men Іshki ister mınıstrligi arasynda avtomatty túrde almasady. Eger memlekettik aqparattyq júıede júrgizýshiniń medıtsınalyq tekserýden ótkeni jáne kólik quralyn basqarýǵa qarsy kórsetilimderiniń joqtyǵy rastalmasa, kólik quralyn basqarý quqyǵy toqtatylady. Bul talap tek 65 jastan asqan júrgizýshiler men múgedektigi bar júrgizýshilerge ǵana qatysty ekenin erekshe atap ótemiz, — delingen habarlamada.
Kelesi ózgeris jol júrisi qaǵıdalaryn bilý deńgeıin qaıta tekserýge qatysty.
Zańda kózdelgen jaǵdaılarda jolda júrý qaǵıdalaryn óreskel buzǵan júrgizýshiler qaıtadan teorııalyq emtıhan tapsyrýǵa jiberilýi múmkin. Mysaly, jol qıylysynan ótýkezinde apattyq jaǵdaı týǵyzý, belgilengen jyldamdyqty birneshe ret asyrý, manevr jasaý, jolaq aýystyrý nemese basyp ozý qaǵıdalaryn qaýipti túrde buzý sııaqty óreskel quqyq buzýshylyqtar. Bul talap barlyq júrgizýshige emes, tek zańda naqty kózdelgen jaǵdaılarda ǵana qoldanylady.
Júrgizýshi dáleldi sebepsiz tıisti qaýlyny alǵan kúnnen bastap eki aı ishinde teorııalyq emtıhanǵa kelmese, bul da kólik quralyn basqarý quqyǵyn toqtatýǵa negiz bolady.
Sonymen qatar alkogoldik, esirtkilik nemese ýytqumarlyq masań kúıde kólik basqarǵany úshin jaýapkershilik kúsheıtildi.
Endi qylmystyq is jábirlenýshimen tatýlasýyna baılanysty toqtatylǵannyń ózinde, quqyq buzýshy segiz jylǵa kólik quralyn basqarý quqyǵynan aıyrylady. Al júrgizýshi kýáligi bomasa, ony segiz jyl boıy alý múmkin bolmaıdy.
— Bul ózgeristerdiń barlyǵy jol júrisi qaýipsizdigin arttyrýǵa, azamattardyń ómiri men densaýlyǵyn qorǵaýǵa baǵyttalǵan. Barsha jol júrisine qatysýshylardy jolda júrý qaǵıdalaryn qatań saqtaýǵa shaqyramyz. Al bul talapqa jatatyn júrgizýshiler mindetti medıtsınalyq tekserýden ýaqytyly ótýi qajet, — dep habarlady Іshki ister mınıstrligi.
Eske salaıyq, buǵan deıin Іshki ister mınıstrligi turǵyn úı kesheniniń aýlasyna kólik qoıýǵa qatysty túsinik bergen edi.
