25 tamyzdan bastap alıment arnaıy bank shotyna aýdarylady
ASTANA. KAZINFORM — 2026 jylǵy 25 tamyzdan bastap Qazaqstanda alıment tóleýdiń jańa tártibi kúshine enedi, dep habarlaıdy Ádilet mınıstrliginiń baspasóz qyzmeti.
Endi atqarýshylyq is júrgizý aıasynda óndiriletin alıment arnaıy banktik shotqa ǵana aýdarylady.
Bul ózgeris 2026 jylǵy 24 maýsymda qabyldanǵan zańǵa sáıkes engizilip otyr. Onyń maqsaty — alımentke arnalǵan aqshanyń tolyq saqtalýyn qamtamasyz etip, ony tek balaǵa nemese eńbekke qabiletsiz adamdy asyraýǵa paıdalaný.
— Jańa tártip boıynsha alıment alýshy arnaıy banktik shot ashyp, onyń derektemelerin sot oryndaýshysyna usynýy qajet. Sot oryndaýshysy óndirilgen alıment qarajatyn tek osy shotqa aýdarady. Arnaıy shottaǵy qarajatqa arest salynbaıdy jáne ol alıment alýshynyń basqa qaryzdaryn óteýge paıdalanylmaıdy. Osylaısha, alıment qarajaty basqa mindettemelerdi óteýge jumsalmaı, tolyq kólemde óziniń maqsatyna paıdalanylady, — delingen habarlamada.
Ádilet mınıstrligi arnaıy shottyń bolmaýy alıment tóleýshini mindetinen bosatpaıtynyn eskertti. Alaıda alıment alýshy arnaıy shottyń derektemelerin usynǵanǵa deıin óndirilgen qarajatty aýdarý múmkin bolmaıdy. Mundaı jaǵdaıda sot oryndaýshysy alıment alýshyǵa arnaıy shot ashyp, onyń derektemelerin berý qajettigin habarlaıdy. Derektemeler usynylǵannan keıin jınalǵan qarajat belgilengen tártippen aýdarylady. Bul aralyqta alıment boıynsha bereshek saqtalady jáne joıylmaıdy.
Mınıstrlik sondaı-aq alımentke arnalǵan arnaıy shot ashatyn bankterdiń tizimin nemese ashylǵan mundaı shottardyń sanyn júrgizbeıtinin habarlady. Bul aqparat Qazaqstan Ulttyq bankiniń, Qarjy naryǵyn retteý jáne damytý agenttiginiń jáne ekinshi deńgeıli bankterdiń quzyretine jatady.
Jańa norma alıment alýshylardyń quqyqtaryn qorǵaýdy kúsheıtip, balalar men eńbekke qabiletsiz adamdarǵa arnalǵan qarajattyń saqtalýyna qosymsha kepildik berýge baǵyttalǵan.
Budan buryn Mańǵystaý oblysynda alıment boıynsha 95 mln teńgeden asa bereshek óndirilgenin jazdyq.
