25 shaqyrymǵa sozylǵan keptelis: qazaq-ózbek shekarasynda júk kólikterin ne bógep tur

TÚRKІSTAN. KAZINFORM — Túrkistan oblysynda júk kólikteriniń júrgizýshileri Ózbekstanmen shekaradaǵy «Baýyrjan Qonysbaev» ótkizý beketiniń aldynda birneshe kúnge sozylǵan kezekke shaǵymdandy. Olardyń aıtýynsha, júk kólikteriniń kezegi shamamen 25 shaqyrymǵa sozylǵan. Memlekettik kirister komıteti kólik keptelisiniń sebepterin túsindirdi.

25 shaqyrymǵa sozylǵan keptelis: qazaq-ózbek shekarasynda júk kólikterin ne bógep tur
Vıdeodan alynǵan kadr

Áleýmettik jelilerde júk kólikteriniń uzyn-sonar kezegi túsirilgen beınejazbalar tarady. Júrgizýshilerdiń aıtýynsha, olar shekaradan ótý úshin eki-úsh táýlikke deıin kútýge májbúr. Sonymen qatar, olardyń sózinshe, ótkizý beketine aparatyn jol boıynda dárethanalar men qajetti turmystyq jaǵdaı qarastyrylmaǵan. Júk kólikteriniń júrgizýshileri keıbir kólikterdiń jalpy kezekti aınalyp ótip, alǵa shyǵyp ketetinine de narazy. 

Jaǵdaıǵa qatysty Kazinform agenttigine Qarjy mınıstrligi Memlekettik kirister komıteti túsinik berdi.

Vedomstvo málimetinshe, «Baýyrjan Qonysbaev» ótkizý beketiniń aldynda júk kólikteriniń shoǵyrlanýyna halyqaralyq júk tasymaly kóleminiń maýsymdyq artýy jáne Qazaqstan aýmaǵy arqyly ótetin tranzıttik aǵynnyń turaqty ósýi sebep bolǵan. Buǵan otandyq kólik-logıstıkalyq baǵyttardyń tartymdylyǵynyń artýy da áser etip otyr.

25 shaqyrymǵa sozylǵan keptelis: qazaq-ózbek shekarasynda júk kólikterin ne bógep tur
Vıdeodan alynǵan kadr

— 2026 jyldyń 10 aıynda Qazaqstan men Ózbekstan shekarasyndaǵy kólik aǵyny 16,2 paıyzǵa ósip, 741,5 myń avtokólikke jetti. Atap aıtqanda, «Baýyrjan Qonysbaev» ótkizý beketi arqyly 321 myń avtokólik ótken. Bul ótken jyldyń sáıkes kezeńimen salystyrǵanda 21 paıyzǵa kóp (265 myń avtokólik). Atalǵan beket táýligine 1500 avtokólik ótkizip otyr. Al onyń jobalyq qýaty — 1000 avtokólik. ıAǵnı, naqty ótkizý kólemi jobada kózdelgen mejeden 50 paıyzǵa joǵary, — dep habarlady vedomstvodan.

Memlekettik kirister komıteti ótkizý beketiniń shtattyq rejımde jumys istep turǵanyn atap ótti. Júktemeni azaıtý maqsatynda kólik aǵynyn «Atameken» ótkizý beketine qaıta bólý, «Atameken — Gýlıstan» shekaralas ótkizý beketteriniń ótkizý múmkindigin arttyrý jáne balamaly baǵyttardy paıdalaný jumystary júrgizilip jatyr.

Komıtet ókilderi kólik keptelisine tasymaldaýshylardyń elektrondy kezekke ýaqytyly tirkelmeýi de sebep bolyp otyrǵanyn habarlady.

— CarGoRuqsat júıesi arqyly elektrondy kezekke aldyn ala tirkelý múmkindigine qaramastan, keıbir tasymaldaýshylar ótkizý beketine aldyn ala tirkelmeı kelip, kezekke tek sol jerge jetken soń ǵana jazylady. Sonyń saldarynan olar belgilengen ýaqytty kútip, ótkizý beketine aparatyn jolda uzaq ýaqyt aıaldaýǵa májbúr. Bul kólik quraldarynyń odan ári shoǵyrlanýyna ákeledi, — dep málimdedi MKK.

Vedomstvonyń málimetinshe, CarGoRuqsat júıesi elektrondy kezektiń ashyqtyǵyn qamtamasyz etedi. Sonymen qatar, ol kólik quraldarynyń kezektiligin baqylaýǵa jáne shekaradan ótýge bolatyn bos ýaqyt aralyqtaryn kórýge múmkindik beredi.

— 2026 jylǵy 3 qarashada saǵat 10:00–degi jaǵdaı boıynsha «Baýyrjan Qonysbaev» ótkizý beketinde elektrondy kezekke tirkelýge arnalǵan 130 bos oryn bolǵan. Demek, jekelegen kólikterdiń ótkizý beketine aparatyn joldarda uzaq ýaqyt turýy barlyq tasymaldaýshynyń shekaradan ótý úshin birneshe táýlik kútýge májbúr ekenin bildirmeıdi, — dep atap ótti komıtet ókilderi.

Memlekettik kirister komıteti júrgizýshilerge shekaradan ótetin kún men ýaqytty aldyn ala tirkep, ótkizý pýnktine belgilengen ýaqytta kelýge keńes berdi. Bul jospardan tys kidiristerdi boldyrmaýǵa kómektesedi.

Aıta keteıik, Qazaqstan men Ózbekstan shekarasynda mundaı jaǵdaı tamyz aıynda da bolǵan edi. Ol kezde áleýmettik jelilerde júk kólikteriniń kezegi 40 shaqyrymǵa deıin sozylǵany týraly aqparat taraǵan. Óńirlik memlekettik kirister departamenti «Baýyrjan Qonysbaev» ótkizý beketi arqyly kólik aǵynynyń aıtarlyqtaı artqanyn jáne onyń jobalyq ótkizý múmkindiginen asyp ketkenin habarlaǵan edi.