25 Otan qorǵaýshy: Leıtenant Asan Jumadildaev

ASTANA. QazAqparat - Qazaqstan Qarýly kúshteriniń 25 jyldyq mereıtoıyna oraı «QazAqparat» HAA elimizdiń Qorǵanys mınıstrligimen birlesip, oqyrman nazaryna «25 Otan qorǵaýshy» atty arnaıy jobany usynady. Onda qazaqstandyq armııadaǵy qyzmetin kúndelikti is emes, boryshym dep sanaıtyn qazaqstandyq áskerı qyzmetshiler jaıynda sóz qozǵalady.

«2016 jyly aǵam Úsen ekeýimiz Qurlyqtaǵy ásker ınstıtýtyn  bitirgen edik. Oqý bitirgennen keıin Shyǵys okrýgke jiberip, qazirgi ýaqytta ekeýimiz de №27946 áskerı bóliminde 4-shi mehanızatsııalanǵan brıgadanyń vzvod komandıri laýazymynda qyzmet etýdemiz. Bala kezimnen áskerı bolýdy armandap, soǵys týraly fılmderdi zor qyzyǵýshylyqpen kóretinmin. Atam Jumadildá Júsipov 1945 jyly Jeńis sherýine qatysqan. Aǵam ekeýimizdiń de jolymyz bolyp, 2015 jyly Qyzyl alańdaǵy áskerı sherýge qatysý múmkindigin aldyq. Bul da meniń armandarymnyń biri edi. Árıne, basty armanym áskerı qyzmetshi  bolý edi. Aǵam ekeýimiz de jaýyngerlik jáne saıası daıyndyq jaǵynan úzdikpiz, qoıan-qoltyq urystan sport sheberligine kandıdatpyz», - dedi Asan Jumadildaev.

Onyń aıtýynsha, aǵasy ekeýi de áskerı mansap jolynda úlken jetistikterge jetýdi aldaryna  maqsat retinde qoıyp otyr. Sondyqtan olar únemi ózderiniń daıyndyq deńgeılerin shyńdap otyrady. Armııadaǵy áskerı qyzmetke qatysty ol búginde kóptegen jastyń ásker qatarynda bolýǵa qulyqtary joq ekendigin atap ótti jáne munyń durys emestigin basa aıtty. Jumadildaevtyń paıymynsha, áskerı qyzmet bul árbir azamattyń Otan aldyndaǵy boryshy sanalady.