25 Otan qorǵaýshy: Kapıtan-leıtenant Samat Dastan
ASTANA. QazAqparat - Qazaqstan Qarýly kúshteriniń 25 jyldyq mereıtoıyna oraı «QazAqparat» HAA elimizdiń Qorǵanys mınıstrligimen birlesip, oqyrman nazaryna «25 Otan qorǵaýshy» atty arnaıy jobany usynady.
Onda qazaqstandyq armııadaǵy qyzmetin kúndelikti is emes boryshym dep sanaıtyn qazaqstandyq áskerı qyzmetshiler jaıynda sóz qozǵalady.
№29011 áskerı bólimi oqý ortalyǵynyń bastyǵy, kapıtan-leıtenant Samat Dastan Táýelsizdik jyldarynyń ishinde Qazaqstannyń áskerı-teńiz kúshteri jemisti damyp kele jatyr dep sanaıdy.
«2001 jyly Respýblıkalyq áskerı mektep-ınternatqa oqýǵa túsip, ony 2003 jyly bitirdim. Osydan keıin Túrkııanyń Áskerı-teńiz ýchılışesine túsip, 2008 jyly ony «ınjener-keme jasaýshy» mamandyǵy boıynsha támamdadym. Sol ýaqytta beri Qazaqstan Respýblıkasynyń Áskerı-teńiz kúshteri qataryna qyzmet etýdemin. Qazirgi ýaqytta Aqtaýdaǵy №29011 áskerı bólimniń oqý ortalyǵyna basshylyq jasaımyn. 2013-2015 jyldary Túrkııa Respýblıkasynyń Áskerı-teńiz kúshteri akademııasynda «ásker basqarýdy ákimshileý» mamandyǵy boıynsha bilim aldym», - dedi Dastan.
Onyń aıtýynsha, ózi basqaratyn oqý ortalyǵynda kishi keme mamandary úsh aılyq kýrsta bilim alady. Olar daıyndyqtan ótkennen keıin Áskerı-teńiz kúshteriniń №21814 áskerı bóliminiń kemelerinde qyzmet etetin bolady.
Samat Dastannyń aıtýyna qaraǵanda, búginde jastardyń boıynan Áskerı-teńiz kúshterinde qyzmet etýge degen qulshynys baıqalady. Degenmen Áskerı-teńiz kúshteri qataryna negizinen buǵan deıin armııada áskerı boryshyn ótegen azamattar alynady.
«Memleket basshysynyń qamqorlyǵy arqasynda Táýelsizdik jyldarynda Qazaqstannyń Áskerı-teńiz kúshteri únemi damý úsinde. Qazirgi ýaqytta zamanaýı kemelerimiz bar. Olardyń qatarynda Oraldaǵy «Zenıt» keme jasaý zaýytynda qurastyrylǵan jáne Reseıden satyp alynǵan kemeler bar. Sáýirde Oralda 4 keme sýǵa túsirildi. Ótken jyly Reseıden mına súzetin keme satyp alyndy. Aldaǵy ýaqytta áskerı flotymyzdy tolyqtyra túsý josparda bar», - dedi kapıtan-leıtenant.
