25 naýryzda «Báıterek» monýmentiniń jaryǵy óshedi
ASTANA. QazAqparat - Erteń Astanada «Báıterek» monýmentiniń, «Haziret Sultan» meshitiniń jáne qaladaǵy ózge de belgili ǵımarattardyń jaryǵy 1 saǵatqa sónedi, dep habarlaıdy QazAqparat.
«Jasyl ekonomıka» jáne G-Global damytý koalıtsııasy» baspasóz qyzmetiniń taratqan aqparatyna sáıkes, Qazaqstanda WWF qoldaýymen «Jer saǵaty» ekologııalyq aktsııasy 25 naýryz kúni saǵat 20:30-da bastalyp, 21:30-ǵa deıin jalǵasatyn bolady. Bul jolǵy Jer saǵatynyń basty taqyryby «Adamnyń ekologııalyq jaýapkershiligi» dep atalady.
«2017 jyldyń 25 naýryzynda Qazaqstanda Dúnıejúzilik jabaıy tabıǵat qorynyń (WWF), G-Global halyqaralyq hatshylyǵynyń, «Jasyl ekonomıka» jáne G-Global damytý koalıtsııasynyń qamqorlyǵymen, Astana qalasy ákimdiginiń qoldaýymen uıymdastyrylǵan «Jer saǵaty» atty jyl saıynǵy aktsııasy ótedi. Іs-sharanyń maqsaty - ǵalamshardyń bolashaǵyna beı-jaı qaramaý belgisi retinde álem halqyn jaryqty jáne turmystyq elektr quraldaryn bir saǵatqa sóndirýge shaqyrý», - delingen taratylǵan aqparatta.
Shara aıasynda elordada «Astana Opera» teatry, «Báıterek» monýmenti, «Máńgilik el» trıýmfaldy arkasy, Táýelsizdik saraıy, «Áziret Sultan» meshiti, «Astana Arena» stadıony syndy nysandar men mádenı eskertkishterdiń jaryqtary bir mezgilde óshiriletin bolady.
Aktsııaǵa elorda ákimi Áset Isekeshev, G-Global halyqaralyq hatshylyǵynyń jetekshisi Serik Nógerbekov, sondaı-aq aqyn Oljas Súleımenov, dańqty boksshy Vasılıı Jırov syndy tanymal azamattar shaqyrylǵan. Onyń barysynda Qazaqstannyń óner juldyzdarynyń qatysýymen kontsert ótedi.
