25 myńnan asa qazaqstandyq qarjy pıramıdalarynan zardap shekti
NUR-SULTAN. QazAqparat – ІІM Tergeý departamentiniń basshysy Sanjar Ádilov qarjy pıramıdasyn qurýmen baılanysty qylmystar jaıynda aıtyp berdi, dep habarlaıdy QazAqparat tilshisi.
«Jyl basynan beri Іshki ister mınıstrliginiń qurylymdary 250 qylmystyq isti tergeýmen aınalysty, onyń ishinde 120-sy sotqa joldandy. Jalpy, qarjy pıramıdasy boıynsha 98 adam qylmystyq iske tartylýda, 63-i qamaýǵa alynǵan», - dedi S. Ádilov mınıstrlik uıymdastyrǵan onlaın brıfıngide.
Onyń aıtýynsha, qarjy pıramıdalary jónindegi qylmystyq ister boıynsha zardap shekken jalpy 25 313 adam anyqtaldy. Keltirilgen shyǵyn kólemi 33 mlrd 254 mln teńgeden asty.
«Alaıaqtar áreketinen kóbine elimizdiń batys jáne ońtústik óńirleriniń turǵyndary zardap shekti. Bul aımaqtarda iri qarjy pıramıdalary belsendi qyzmet etken. Osy oraıda «Garant 24d», «Estate Lombard», «Vygodnyı zaım», «Indigo-24 Evolution», «Gold Company LTD», «HomeAutoInvest» jáne basqalary boldy», - dedi departament basshysy.
Onyń atap ótýinshe, eń qomaqty shyǵyn Aqtóbe, Túrkistan, Batys Qazaqstan, Atyraý, Pavlodar, Qyzylorda, Mańǵystaý oblystary men Shymkent, Nur-Sultan qalalarynyń turǵyndaryna keltirilgen.
