25 myń teńgege iPhone «satqan» almatylyq alaıaq ustaldy
PETROPAVL. QazAqparat - Arzanqol iPhone almaq bolǵan Petropavl turǵyny mektepti keshe ǵana bitirgen almatylyq jasóspirimniń arbaýyna túsken, dep habarlaıdy QazAqparat tilshisi.
«Ol Olx.kz-ten 25 myń teńgege telefon satylady degen jarnamany kórgen. Sonyń 20 myń teńgesin qiwi-ámııan arqyly tóleý qajet bolǵan. Aqsha aýdarylǵan soń álgi «satýshy» da joq, telefon da joq», - deıdi Soltústik Qazaqstan oblystyq ishki ister departamenti baspasóz qyzmetiniń ókilderi.
Jedel sharalardyń nátıjesinde mektepti endi ǵana bitirgen jasóspirim ustalǵan. Ol jeli arqyly «kásipkerlik qyzmet» júrgizip, arzan telefon satatyn «kompanııa qurǵan». Klıentterge basqa azamatqa tıesili tulǵasyn kýálandyratyn qujattyń elektrondy kóshirmesin bergen.
«Ol ınternetten eki kýáliktiń kóshirmesin júktep alǵan. Qujattar Qazaqstanda turatyn, ómirde bar adamdarǵa tıesili. Olar óz qujattarynyń kóshirmesin buryn ınternettegi ashyq resýrsqa qaldyrǵan. Ol azamattardyń atynan ınternette paraqshalar ashylǵan. Al jasóspirim bóten adamnyń qujatyn qylmystyq maqsatta paıdalanǵan», - deıdi Petropavl ІІB qylmystyq polıtsııa bóliminiń bastyǵy Rýslan Syzdyqov.
Internettegi jalǵan kompanııa taǵy qansha adamdy aldap soqqanyn almatylyq polıtseıler anyqtaıdy. Petropavl polıtsııasy kúdiktiniń isin, aýmaqtyq prıntsıp boıynsha, solarǵa tapsyrdy.
Kúdikti QR Qylmystyq kodeksiniń 190-babyna («Alaıaqtyq») sáıkes, 4 jylǵa deıingi merzimge bas bostandyǵynan aıyrylýy múmkin.
Jyl basynan beri Soltústik Qazaqstan oblysynyń polıtseıleri 24 ınternet-alaıaqtyq isin ashty. Olardyń barlyǵynda alaıaqtar aldyn ala tólem jasaýdy talap etip otyrǵan.
