2,5 mlrd teńge jymqyrdy degen kúdikti Vetnamnan jetkizildi
ASTANA. KAZINFORM — Vetnam Sotsıalıstik Respýblıkasynan Qazaqstan Respýblıkasy Ádilet mınıstrliginiń «Sot saraptamalary ortalyǵy» RMKQ- da memlekettik satyp alýlardy júrgizý kezinde 2,5 mlrd teńge kóleminde bıýdjet qarajatyn jymqyrýdy uıymdastyrdy degen kúdikti elge jetkizildi.
Eske salsaq, 2023–2025 jyldarǵa arnalǵan Esirtkige qarsy is-qımyl jáne esirtki bıznesine qarsy kúres jónindegi keshendi jospar aıasynda sot saraptamasy organdarynyń materıaldyq-tehnıkalyq bazasyn nyǵaıtý maqsatynda respýblıkalyq bıýdjetten 10 mlrd teńgeden astam qarajat bólingen.
— Alaıda kúdikti ortalyq dırektory Satybaldıev R.K., Memlekettik satyp alý departamentiniń basshysy Iskenderova D. B., sondaı-aq «Mark Invest» JShS men «Direct Services» JShS-niń basshysy Shıntemırova A.A.-men sóz baılasyp, jabdyqtardyń qunyn úsh esege deıin negizsiz kóterý jáne jalǵan kommertsııalyq usynystardy paıdalaný arqyly bıýdjet qarajatyn jymqyrýdy uıymdastyrǵan.
Sot úkimimen Satybaldıev R.K., Iskenderova D. B. jáne Shıntemırova A.A. kináli dep tanylyp, olardyń árqaısysynyń múlki tárkilenip, 3 jyldan 8 jylǵa deıin bas bostandyǵynan aıyrý jazasy taǵaıyndaldy, — delingen QMA habarlamasynda.
2025 jylǵy naýryzda uıymdastyrýshy halyqaralyq izdeýge jarııalanyp, sot sanktsııasymen oǵan qatysty syrttaı qamaýda ustaý túrindegi bultartpaý sharasy qoldanyldy.
Bıylǵy jyldyń basynda ol Vetnam Sotsıalıstik Respýblıkasynyń aýmaǵynda ustaldy.
Qarjylyq monıtorıng agenttiginiń, Interpoldyń Ulttyq ortalyq bıýrosynyń jáne Qazaqstan Respýblıkasy Syrtqy ister mınıstrliginiń birlesken jumysynyń nátıjesinde kúdikti ustalyp, Qazaqstan Respýblıkasyna jetkizildi.
Qylmystyq is sotqa joldandy.
Qazaqstan Respýblıkasy Qylmystyq-protsestik kodeksiniń 201-babyna sáıkes ózge aqparat jarııa etýge jatpaıdy.
Aıta ketelik Qazaqstanǵa World Business Consulting qarjy pıramıdasy isi boıynsha kúdikti ekstradıtsııalanǵan edi.
