2,5 mln-nan asady: Almaty oblysy týrıstik rekord ornatty
ASTANA. KAZINFORM — Almaty oblysynda týrıstik aǵymnyń rekordtyq ósimi tirkeldi, dep habarlaıdy Almaty oblysynyń ákimdigi.
Ákimdik atap ótkendeı, 2025 jyly óńirge 2,5 mıllıonnan astam adam keldi — bul ótken jylmen salystyrǵanda shamamen 40%-ǵa kóp.
Demalýshylar arasynda eń tanymal baǵyttardyń biri dástúrli túrde Qapshaǵaı sý qoımasy bolyp otyr: bıylǵy jazda munda shamamen 1 mıllıon 800 myń týrıst tynyqty. Qalǵandary óńirdiń tabıǵı injý-marjandaryn — Kólsaı kólderi, Sharyn shatqaly jáne Іle-Alataý ulttyq saıabaǵyn tańdady.
— Almaty oblysy týrızm salasynda joǵary áleýeti bar aımaqtardyń biri retinde óz mártebesin turaqty túrde saqtap keledi. Munda týrıstik aǵym maýsymǵa qaramastan báseńdemeıdi. Bıyl sheteldik týrıster sany 12%-ǵa, al ishki týrızm 25%-ǵa artqan, — delingen habarlamada.
Almaty oblysynyń týrızm basqarmasynyń basshysy Qýanyshbek Mırambekulynyń aıtýynsha, bıyl óńirdegi úsh ulttyq saıabaq — «Іle Alataýy», «Kólsaı kólderi» jáne «Sharyn» — 700 myńnan astam adamdy qabyldaǵan.
Qapshaǵaı sý qoımasynyń jaǵalaýy — Qonaev qalasy úlken suranysqa ıe. Jazǵy maýsymda munda 1,8 mıllıonnan astam týrıst kelip, jaǵajaılyq demalystyń raqatyn kórdi. Sondaı-aq bıyl oqıǵaly týrızm belsendi damyp, jaqsy nátıjeler kórsetti.
Sheteldik qonaqtar arasynda Kólsaı kólderi, Sharyn shatqaly jáne Іle-Alataý ulttyq saıabaǵy erekshe tanymal. 2025 jyldyń toǵyz aıynda bul úsh nysanǵa 700 myńnan astam adam baryp, olardyń 530 myńy Kólsaı kólderine kelgen. Ár úshinshi kelýshi — sheteldik týrıst.
Bıyl aımaqqa Úndistannan, Parsy shyǵanaǵy elderinen jáne Reseıden kóptegen qonaq keldi.
Túrkııadan kelgen týrıst Mert Fýrkan óz áserimen bólisti.
— Munda óte ádemi, maǵan unady. Bizdiń Túrkııada uqsas jer bar — Ýzynkól, biraq mundaǵy tabıǵat baıyraq: jasyl jelek kóp, sýy taza ári móldir. Men bul jerlerdi kópten kórgim kelgen — bul ata-babamyzdyń jeri. Túrki halyqtaryna osy óńirge kelip, óz kózderimen kórýdi keńes beremin, — dedi Fýrkan.
Týrıstik aǵymnyń ósýine ınfraqurylymdy dáıekti damytý yqpal etti. 2025 jyly týrıstik baǵyttardy abattandyrýǵa 171 mıllıon teńge bólindi. Jumystar «Kólsaı kólderi», «Іle-Alataý» ulttyq saıabaqtarynda jáne Qonaev qalasynda júrgizilip jatyr.
Bul jerlerde pırster, ekosatylar, kireberis toptar men ot jaǵý aımaqtary ornatylyp, metall qańqaly jańa serýendeý soqpaqtary salyndy. Bul sharalar demalýshylarǵa qolaıly jaǵdaı jasaýǵa jáne óńirdiń tartymdylyǵyn arttyrýǵa baǵyttalǵan.
Osyǵan deıin Qazaqstanda týrızmdi damytýdyń negizgi áleýeti ataldy.