25 myńnan astam múgedektigi bar adam jumyspen qamtyldy
ASTANA. KAZINFORM — Jumyspen qamtýǵa járdemdesýdiń túrli sharalarymen 25,5 myń múgedektigi bar adam qamtyldy. Búgingi tańda barlyǵy erekshe qajettilikteri bar 111 myń adam jumyspen qamtylǵan, bul eńbekke qabiletti múgedektigi bar adamdardyń jalpy sanynyń 30%-yn quraıdy. Bul týraly vedomstvonyń baspasóz qyzmeti málim etti.
Qazirgi ýaqytta Qazaqstanda múgedektigi bar 743,9 myń adam turady, ol halyqtyń jalpy sanynyń 3,7%-yn quraıdy, olardyń 375,2 myńy eńbekke qabiletti jasta.
— QR Áleýmettik kodeksine sáıkes jergilikti atqarýshy organdar múgedektigi bar adamdar úshin aýyr jumystardaǵy, eńbek jaǵdaılary zııandy, qaýipti jumystardaǵy jumys oryndaryn esepke almaǵanda, jumysshylardyń jalpy sanynyń 2-den 4%-na deıin (jaldamaly jumyskerlerdiń jalpy sany keminde 50 adam bolǵan kezde) kólemde jumys oryndaryna kvota belgileıdi. Aǵymdaǵy jyldyń 3 toqsanynda kvota boıynsha múgedektigi bar 7,1 myń adam jumysqa ornalastyryldy, — delingen habarlamada.
Sondaı-aq erekshe qajettilikteri bar adamdar jumyspen qamtýǵa járdemdesýdiń belsendi sharalaryna tartylmaq. Máselen, aǵymdaǵy jyldyń 1 qarashadaǵy jaǵdaı boıynsha turaqty jumysqa 4,8 myń adam, jastar praktıkasyna — 538 adam, áleýmettik jumys oryndaryna — 538 adam, qoǵamdyq jumystarǵa — 5,7 myń adam, «Kúmis jas» jobasy boıynsha — 758 adam, «Alǵashqy jumys orny» jobasy boıynsha — 120 adam, «Urpaqtar kelisimsharty» jobasy boıynsha — 9 adam jumysqa ornalastyryldy.
Qysqa merzimdi kásiptik oqytýmen 277 adam, «Bastaý bıznes» jobasy boıynsha kásipkerlik negizderine oqytýmen 4,5 myń adam qamtyldy.
Halyqtyń áleýmettik osal toptaryna jatatyn azamattarǵa óz bıznesin ashý úshin 400 AEK-ke deıingi (1,6 mln teńge) mólsherinde memlekettik granttar beriledi. Búgingi tańda 1,4 myń múgedektigi bar adam osyndaı qoldaýǵa ıe boldy.
Sondaı-aq, 2018 jyldan bastap halyqaralyq tájirıbeni eskere otyryp, múgedektigi bar adamdardy jumysqa ornalastyrý úshin arnaıy jumys ornyn jaraqtandyrýǵa baılanysty jumys berýshilerdiń shyǵyndaryn sýbsıdııalaý tártibi engizildi. Aǵymdaǵy jyly osyndaı 87 arnaıy jumys orny quryldy.
Aıta keteıik, bıyl múgedektigi bar jandar Áleýmettik qyzmetter portaly arqyly 529 myń tapsyrys berdi.