25 myń gektar jerdi sýarýǵa múmkindik beretin joba qolǵa alyndy
ASTANA. KAZINFORM – Premer-mınıstrdiń orynbasary — ulttyq ekonomıka mınıstri Serik Jumanǵarın Valmont Industries kompanııasynyń Eýrazııa jáne Latyn Amerıkasy boıynsha aımaqtyq vıtse-prezıdent Fılıpp Shmıdt-Holtsman bastaǵan delegatsııasymen kezdesti. Bul týraly Úkimettiń baspasóz qyzmeti habarlady.
Jıynda elimizde sýarmaly eginshilikti damytý, zamanaýı sý únemdeý tehnologııasyn engizý jáne mehanıkalandyrylǵan ırrıgatsııalyq júıelerdiń álemdik iri óndirýshileri men dıstrıbıýtorynyń biri VALLEY/Valmont Industries jańbyrlatyp sýarý mashınalaryn óndirýdi jergiliktendirý jobasyn júzege asyrý máseleleri talqylandy.
Serik Jumanǵarın sýarmaly jerler aýmaǵyn keńeıtý agroónerkásip keshenindegi memlekettik saıasat basymdyǵynyń biri ekenin jetkizdi.
- Elimizdegi aýyl sharýashylyǵy jerleriniń áleýeti zor ekenin jáne Memleket basshysynyń sýarmaly jer kólemin ulǵaıtý jónindegi tapsyrmasyn eskere otyryp, ırrıgatsııalyq zamanaýı tehnıka óndirisin damytý biz úshin erekshe mańyzǵa ıe. Búginde Valmont Industries kompanııasynyń jobasy qyzyǵýshylyq týdyryp otyr. Ol otandyq fermerlerge qajetti jabdyqty jetkizý merzimin edáýir qysqartýǵa múmkindik beredi, — dep atap ótti Serik Jumanǵarın.
Búgingi tańda VALLEY sýarý mashınasyn jergilikti qurastyrýdy uıymdastyrý jobasy sońǵy júzege asyrý satysynda. Óndiristik alań otandyq «Imstalkon» AQ holdınginiń bazasynda qurylǵan. Onda «keden qoımasy» jáne «erkin qoıma» rejımi bar aımaqtar sekildi qajetti ınfraqurylym tolyǵymen daıyn.
Joba qazirdiń ózinde joǵary naryqtyq áleýet kórsetip jatyr. Tek Qaraǵandy oblysy boıynsha shamamen 250 jańbyrlatyp sýarý mashınasyn óndirýge baǵyttalǵan keleshegi zor jobalardyń portfeli qalyptastyryldy. Bul 25 myń gektarǵa jýyq aýyl sharýashylyǵy alqabyn sýarýǵa múmkindik beredi.
Kezdesýge qatysýshylar óndiristi jergiliktendirý jabdyqtardy jetkizý merzimin qysqartýǵa, oǵan otandyq aýyl sharýashylyǵy óndirýshileriniń qol jetkizýin arttyrýǵa múmkindik beretinin jáne Qazaqstanda sý únemdeý tehnologııasy men sýarmaly eginshilikti damytýdaǵy mańyzdy qadam bolatynyn atap ótti.
Kezdesý sońynda Serik Jumanǵarın Aýyl sharýashylyǵy mınıstrligine múddeli memlekettik organdar jáne ákimdiktermen birlesip, óndiristi jergiliktendirý isin odan ári júrgizip, fermerlerdiń zamanaýı ırrıgatsııalyq tehnıkaǵa qol jetkizýin arttyrýda ınvestorlarmen jumysty jalǵastyrýdy tapsyrdy.
Aıta ketelik sýarý maýsymyna arnalǵan sý lımıti bekitilgen edi.
