2,5 myń áleýmettik qyzmetker biliktiligin dáleldedi
ASTANA. KAZINFORM — Eńbek jáne halyqty áleýmettik qorǵaý mınıstrligi áleýmettik qyzmetkerlerdiń kásibı deńgeıin arttyrý boıynsha júıeli jumysty jalǵastyryp jatyr. Bıyl 2 453 áleýmettik qyzmetker biliktilikti taný protsedýrasynan sátti ótti. Bul týraly vedomstvonyń baspasóz qyzmeti málim etti.
Áleýmettik qyzmetkerlerdiń biliktiligin taný ortalyǵy 2025 jyly Áleýmettik qorǵaý salasyn damytýdyń ulttyq ǵylymı ortalyǵy bazasynda quryldy. Búgingi tańda 2 453 áleýmettik qyzmetker kásibı daıyndyǵyn rastady. Alynǵan sertıfıkat attestattaýdan ótý jáne biliktilik sanatyn berý kezindegi negizgi qujat bolyp tabylady.
— Byltyrdan bastap áleýmettik sala mamandarynyń kásibı quzyrettiligi týraly málimetterdi qamtıtyn Áleýmettik qyzmetkerler tizilimi jumys isteıdi. Budan bólek Enbek.skills bilim berý platformasynda 12 myńnan astam áleýmettik qyzmetker oqytyldy. Olardyń barlyǵy kýrstardy sátti aıaqtap, sertıfıkattaryn aldy. Oqytý modýlderi keıs-menedjmentti, vedomstvoaralyq ózara is-qımyldy, qyzmet alýshylardy súıemeldeýdi tsıfrlandyrýdy jáne áleýmettik jumystaǵy ınklıýzıvti tásilderdi qamtıdy, — delingen habarlamada.
Іske asyrylyp jatqan barlyq sharalar áleýmettik qyzmetkerlerdi halyqaralyq standarttarǵa sáıkes kásibı daıarlaýdyń joǵary deńgeıin qamtamasyz etýge jáne halyqqa kórsetiletin áleýmettik qyzmetterdiń sapasyn arttyrýǵa baǵyttalǵan.
Mınıstrlik kadrlyq áleýetti damytý, tsıfrlyq quraldardy engizý jáne áleýmettik qorǵaýdyń turaqty, adamǵa baǵyttalǵan júıesin qalyptastyrý boıynsha júıeli jumysty jalǵastyra beredi.
Júrektiń jylýy men meıirimin kórsetetin áleýmettik qyzmetkerlerdiń jumysy qalaı bastalady, qalaı órbıdi? Myna siltemeden oqyńyz.
