2,5 mıllıonnan astam qazaqstandyq zeınetaqy tólemderin alady
ASTANA. KAZINFORM — Áleýmettik saıasattyń mańyzdy baǵyttarynyń biri aǵa býyndy qoldaý bolyp qala beredi. Memleket basshysynyń tapsyrmasy boıynsha Úkimet yntymaqty, bazalyq jáne jınaqtaýshy zeınetaqylardan turatyn zeınetaqy júıesiniń turaqty jumys isteýin qamtamasyz etedi. Bul týraly Úkimettiń baspasóz qyzmeti málim etti.
— Búgingi tańda 2,5 mln-nan astam qazaqstandyq zeınetaqy tólemderin alady. Jyl saıyn zeınetaqy mólsheri ındekstelip otyrady jáne áleýmettik kórsetkishter men ınflıatsııany eskere otyryp joǵarylatylady. Ardagerlerdi, tyl eńbekkerlerin, saıası qýǵyn-súrginnen zardap shekken adamdardy jáne halyqtyń basqa da áleýmettik osal toptaryn qosa alǵanda, azamattardyń 18 sanaty arnaýly memlekettik járdemaqy alady, — dep habarlady Mınıstrler kabınetinen.
Osylaısha, Qazaqstannyń áleýmettik saıasaty búginde adam ómiriniń barlyq kezeńin qamtıtyn qoldaý júıesi retinde qalyptasyp keledi. Oǵan medıtsınalyq kómek kórsetý, ana men balany qorǵaý, otbasylarǵa qoldaý, muqtaj azamattarǵa ataýly áleýmettik kómek berý, bilim alý múmkindikterin keńeıtý, ǵylymdy damytý jáne turaqty zeınetaqy júıesin qamtamasyz etý kiredi.
Bul áleýmettik memleket qaǵıdattarynyń jáne Prezıdent Qasym-Jomart Toqaevtyń Ádiletti Qazaqstan qurý jónindegi baǵytynyń naqty kórinisi. Mundaǵy basty qundylyq — adam, onyń ál-aýqaty men ómir sapasy.
Aıta keteıik, Qazaqstanda zeınetaqy taǵaıyndaý jáne tóleý tártibi ózgeredi.
