25 maýsymda Astana ótetin tehnologııalyq festıvalde «Startup Kazakhstan» baǵdarlamasy tanystyrylady

ASTANA. QazAqparat - 25 maýsymda Astana Business Campus tehnoparkinde «Tech Garden Summer FEST» tehnologııalyq festıvali bolyp ótedi. Іs-shara aıasynda «Startup Kazakhstan» Halyqaralyq baǵdarlamasy tanystyrylatyn bolady.

Baǵdarlamanyń tanystyrylymyna Astana ákimi Á.Isekeshev, Nazarbaev Ýnıversıtetiniń prezıdenti Sh.Katsý, «Innovatsııalyq tehnologııalar parki» (Almaty Tech Garden) Derbes klasterlik qorynyń bas dırektory S.Kettebekov, «Nazarbayev University Research and Innovation System» (NURIS) JM bas dırektory A.Jakýpov, sondaı-aq, qazaqstandyq jáne halyqaralyq sarapshylar, shaǵyn jáne orta bıznes ókilderi, jas ǵalymdar jáne ınnovatorlar qatysady.

Bul is-sharany Nazarbaev Ýnıversıtetiniń Astana Business Campus ınnovatsııalyq klasteriniń qoldaýymen Almaty Tech Garden brendimen kórinip júrgen «Innovatsııalyq tehnologııalar parki» Derbes klasterlik qory uıymdastyrady. 

Eske sala ketsek,  «Startup Kazakhstan» Halyqaralyq baǵdarlamasy «5 ınstıtýtsıonaldyq reformalardy júzege asyrý boıynsha 100 naqty qadam» Ult josparynyń 63-qadamyn oryndaý aıasynda «Innovatsııalyq tehnologııalar parki» Derbes klasterlik qorymen iske asyrylady.

Oǵan qosa, baǵdarlama QR Investıtsııalar jáne damý mınıstrliginiń ınnovatsııalyq saıasatynyń quramdasy bolyp tabylyp, jáne de QR Indýstrıaldy-ınnovatsııalyq damýy Memlekettik baǵdarlamasynyń ekinshi besjyldyǵy jáne «Sandyq Qazaqstan» baǵdarlamasynyń aıasynda júzege asyrylýda.