25 qyrkúıekte eGov portalynda AES ataýyn usynýǵa arnalǵan bólim ashylady
ASTANA. KAZINFORM – Erteń, 25 qyrkúıekte, eGov portalynda ár azamat eldegi alǵashqy atom elektr stantsııasyna ataý usynatyn arnaıy bólim iske qosylady.
Sonymen qatar qatysýshylarǵa arnalǵan banner ornalastyrylady jáne azamattarǵa push-habarlama joldanady.
Bastama Qazaqstandaǵy alǵashqy AES-ke úzdik ataý berý jónindegi jalpyulttyq konkýrstyń sheńberinde júzege asyrylady.
Azamattar óz nusqalaryn jańa bólim arqyly usyna alady.
Aıta keteıik, buǵan deıin alǵashqy AES-ke úzdik ataý berý konkýrsy 25 qyrkúıekte bastalatyny habarlandy.
Atom energetıkasy jónindegi agenttik tóraǵasy Almasadam Sátqalıev jańa AES-tiń ataýyna qatysty pikir aıtty.
- Onyń ataýyna qatysty tıisti ólshemshartty aıqyndadyq. Bul turǵyda tarıhı ári ımıdjdik mańyzdylyǵy eskeriledi. AES ataýy tarıhı-mádenı murany qamtıdy, — dedi Almasadam Sátqalıev.
AES ataýyn tańdaý jónindegi konkýrstyq komıssııanyń erejesi men quramy bekitildi.
Elimiz atom jobasyn iske asyrýdyń basty kezeńine ótip, birinshi AES qurylysyna daıyndyq júrgizip jatyr. Osy oraıda, agenttik tilshisi sarapshylardyń pikirin bilgen edi.
- Atom elektr stansasyyń qurylysy – bul jaı ǵana jańa elektr stansasy emes, Qazaqstannyń búkil energetıkasy traektorııasynyń ózgerýi. Uzaq merzimdi keleshekke myqty baza qalanyp, ol júıeli táýekelderdi azaıtady jáne ónerkásip pen ınvestorlar úshin boljamdylyq beredi, - dedi «Atameken» Ulttyq kásipkerler palatasynyń basqarýshy dırektory, eńbek sińirgen energetık Jaqyp Haırýshev.
Prezıdent Qasym-Jomart Toqaev ekinshi, úshinshi AES qurylysyn josparlaýdy qazir bastaý kerek ekenin aıtty.
