25 qazandy ulttyq mereke retinde bekitý – eldik ári egemendik turǵysynan mańyzdy qadam - Áshimbaev

ASTANA. QazAqparat – Qazaqstannyń Táýelsizdigi shyn máninde 25 qazannan bastaldy. Bul týraly Senat tóraǵasy Máýlen Áshimbaev aıtty, dep habarlaıdy QazAqparat tilshisi.

Aıta keteıik, búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine kınematografııa, mádenıet jáne merekeler máseleleri boıynsha ózgerister men tolyqtyrýlar engizý týraly» Zańy qabyldandy. Qujatta 25 qazandaǵy Respýblıka kúnin ulttyq mereke retinde belgileıtin norma eskerilgen.

«Qabyldanǵan zań mádenıet jáne kınematografııa salasyndaǵy memlekettik saıasattyń quqyqtyq-ekonomıkalyq, áleýmettik jáne uıymdastyrýshylyq negizderin jetildirýge baǵyttalǵan. Jańa normalar mádenı is-sharalardy joǵary deńgeıde ótkizýge jáne halqymyzdyń tarıhy men mádenıetin keńinen dáripteýge múmkindik beredi dep esepteımiz. Sondaı-aq osy zańǵa sáıkes, 25 qazan ulttyq mereke – Respýblıka kúni bolyp bekitildi. Bul tarıhı jáne óte mańyzdy sheshim. Elimizdiń Táýelsizdigi shyn máninde osy kúnnen bastalady. Sol sebepti osy kúndi ulttyq mereke retinde bekitý – eldik ári egemendik turǵysynan mańyzdy qadam. Aldaǵy ýaqytta bul meıram Táýelsizdigimizdi dáripteýge jáne nyǵaıtýǵa óz úlesin qosady dep senemiz», - dedi M. Áshimbaev.

Óz kezeginde senator Nurtóre Júsip 25 qazandaǵy Respýblıka kúninin Ulttyq mereke retinde qabyldaý erekshe oqıǵa ekenin atap ótti. «Qazaqstan Táýelsizdigi osy datadan bastalady. Sondyqtan osyndaı tarıhı sheshimge kýá bolyp otyrmyz. Qazaqstan halqy ulttyq mereke retinde 25 qazandy joǵary mártebemen toılaıtyn bolady», - dedi N. Júsip.

Foto:senate.parlam.kz