25-30 jastaǵy mamandarǵa jol berý kerek - Nursultan Nazarbaev

ASTANA. QazAqparat - QR Prezıdenti Nursultan Nazarbaevtyń aıtýynsha, tehnologııalyq jańǵyrtýdy oıdaǵydaı atqarý úshin adam kapıtalyn damytý qajet. Kásibı mamandardy tirnektep júrip jınaý kerek. Onsyz alǵa qoıylǵan maqsattardy iske asyrý múmkin emes, dep habarlaıdy QazAqparat tilshisi.

«Bizde bilim salasy da, ǵylym salasy da ındýstrııalandyrý maqsattaryna saı bolýy qajet. Kásibı ári bilikti mamandar bolmasa, eshqandaı ındýstrııalandyrý da, tsıfrlandyrý da bolmaıdy. Al ondaı mamandardy tirnektep júrip jınap, naqty maqsattarǵa jumyldyrý kerek. Olardyń oılap tapqan tehnologııalaryn qoldanysqa engizgen jón. «Bolashaq» baǵdarlamasy da, Nazarbaev ýnıversıteti de, jalpy barlyq ýnıversıtetter soǵan jumys isteýi kerek. Zııatkerlik mektepter daryndy balalardy iriktep jatyr. Negizi, qazir jumysty 25-30 jastaǵy azamattarǵa berý kerek. Odan qorqatyn eshteńe joq. Bárimizdi alǵa jeteleıtin solar. Kedergi jasamaı, olarǵa jol berý kerek», - dedi Prezıdent búgin jalpyulttyq telekópir kezinde.

Memleket basshysy «100 jańa esim» jobasyn da eske alyp, daryndy jastardy qoldaý máselesine toqtaldy.

«Jaqynda men «100 jańa esim» jobasyna kirgen azamattarmen kezdestim. Onda men múldem basqa adamdardy kórdim, olar zaman talabyna saı oılaıdy, kózqarasy da basqasha. 18-20 jastaǵy balalar oıǵa kelmeıtin nárselerdi jasap júr. Mysaly, bir jigit ýnıversıtet jertólesinde otyryp, arnaıy rozetkany oılap tapty. Sonyń arqasynda energııanyń 30 paıyzyn únemdeýge bolady. Shetelde ony birden baıqaıtyn edi», - dep atap kórsetti Nursultan Ábishuly.

Aıta keteıik, Prezıdenti Nursultan Nazarbaev sheteldegi qarjyny qaıtarýǵa qatysty arnaıy zańnamany da ázirleýdi tapsyrdy. Atalǵan mindet Úkimet basshysy Baqytjan Saǵyntaevqa júkteldi .